Aqmescit SİZOsında bulunğan Qırımtatar Milliy Meclisiniñ reis muavini Ahtem Çiygoz qanunğa köre kartserge atıldı, dep bildire Rusiye cezalarnı yerine ketirüv federal hızmetiniñ (FSİN) Qırım idaresi matbuat hızmetiniñ yolbaşçısı Alena Mamutova.
«15.07.1995 senesine ait №103-F3 Federal qanunnıñ 40-ıncı maddesine binaen, Ahtem Çiygoz apishane rejimini bozğanından sebep SİZO-1 yolbaşçısınıñ qararına köre ve ekimniñ onıñ kartserde bulunması mümkün olğanını tasdıqlağan qararına köre kartserge atıldı», – dep ayttı o. Onıñ qayd etkenine köre, böyle bir qarar içün prokuratura ya da mahkeme qararına acet yoq, dep bildire Krım.Media.
Matbuat hızmeti Ahtem Çiygoznıñ açlıq grevi aqqında malümatnı red etti.
Çarşenbe künü, mayıs 6-da, Qırımtatar Milliy Meclisi reisiniñ birinci muavini Nariman Celâl bildirdi ki, Qırımda Aqmescit SİZOsında bulunğan Qırımtatar Milliy Meclisi reisiniñ muavini Ahtem Çiygoznı kartserge attılar. Ahtem Çiygoz ise açlıq grevine başladı.
Onı 2015 senesi yanvar ayında 2014 senesi fevral 26 künü «kütleviy çatışmalarnıñ teşkil etilmesi ve iştirak etmesinde» şeklep, taqiqat çerçivesinde yaqaladılar. Çiygoznı 2015 senesi fevral 19-ğa qadar apiske aldılar, soñra da bu müddetni mayıs 19-ğa qadar arttırdılar.
