Qırımtatarlarnıñ aq-uquqlarını qorçalav komitetiniñ koordinatorı, Meclis azası Eskender Bariyev «fevral 26 işi» boyunca daa bir kişi yaqalanğanını bildire. Onıñ malümatına köre, cumaaqşamı künü, mayıs 7-de, saba Sudaqnıñ Suvuq Sala qasabasında (Gruşevka) Mustafa Degermenci yaqalandı.
Bunı Bariyev Facebookta bildire.
«Avtomatları olğan 6-8 kişilik taqım yaqaladı. Ana-babasınıñ aytqanına köre, olar işke kete ediler, soqaqta yaqalav gruppası yaqınlaştı, Mustafanı urdı, kelepçelerni taqtı ve maşinağa oturttılar. Anası soradı: «Ne içün?» Olar onıñ cinayetçi olğanın ve fevral 26 mitinginde iştirak etkenini ayttılar», – dep tarif etti uquq qorçalayıcı.
Onıñ malümatına köre, ana-babasına Mustafanı Aqmescitteki Taqiqat komitetine alıp keteceklerini bildirdiler. Mustafa ticaret temsilcisi olıp çalışa.
Qırımtatar Milliy Meclisi reisiniñ birinci muavini Nariman Celâl Qırım.Aqiqatqa bildirdi ki, bu malümat daa teşkerile.
Qırımnıñ Rusiye uquq qoruyıcıları bu yaqalav aqqında bir de bir resmiy malümat bermegen ediler.
2014 senesi fevral 26-da Qırım parlamentiniñ binası ögünde Qırımtatar Milliy Meclisi ve «Rus birliginiñ» bir qaç biñ tarafdarı toplaşqan edi. Tedbirni Meclis reisi Refat Çubarov ve «Rus birliginiñ» lideri Sergey Aksönov teşkil ettiler. Çatışmalar neticesinde eki insan elâk oldı. Rusiye Taqiqat komiteti bundan sebep cinaiy işni açtı.
Onıñ taqiqatı çerçivesinde «kütleviy numayışlarnı teşkil etüv ve iştirak etüvde şeklengen» Qırımtatar Milliy Meclisiniñ reis muavini Ahtem Çiygoz yanvar 29-da yaqalandı. Onı 2015 senesi fevral 19-ğa qadar apiske aldılar, soñra da apis müddetini mayıs 19-ğa qadar arttırdılar.
Aprel 22-de işbu iş boyunca ATR qırımtatar telekanalınıñ operatorı Eskender Nebiyev apiske alındı, bundan evel ise Ali Asanov da apiske alınğan edi.
