Link açıqlığı

Mayıs 18 künü sürgünlik yıllığına bağışlanğan Qırım tedbirlerinde Meclis qırımtatarlarğa yapılğan basqı, şu cümleden apiske alınğan ve mayıs 6-da kartserge atılğan Meclis reisi Ahtem Çiygoz aqqında aytacaq ola.

Bunı Qırımtatar Milliy Meclisi reisiniñ birinci muavini Nariman Celâl Qırım.Aqiqatqa bildirdi.

«Bizler bunı mıtlaqa aytacaqmız, al-azırda qullana bilecegimiz qanuniy usullar bular. Bizler ne olğanını ayta bilemiz. Çünki «fevral 26 işi» boyunca basqı quvetleşmekte», – dedi o.

Celâlnıñ aytqanına köre, Meclis Ahtem Çiygoznıñ kartserdeki vaziyeti ve alı aqqında şimdilik bir şey bilmey.

«Biz onıñnen yalıñız adliyeci üzerinden bağ tutamız, şimdilik yañı malümat olmadı», – dedi Celâl.

Çarşenbe künü, mayıs 6-da, Qırımtatar Milliy Meclisi reisiniñ birinci muavini Nariman Celâl bildirdi ki, Qırımda Aqmescit SİZOsında bulunğan Qırımtatar Milliy Meclisi reisiniñ muavini Ahtem Çiygoznı kartserge attılar. Ahtem Çiygoz ise açlıq grevine başladı.

Meclis reisi Refat Çubarov dedi ki, Qırımda Qırımtatar Milliy Meclisiniñ reis muavini Ahtem Çiygoznıñ aqqından kelecek olalar.

Mayıs 5-te Qırımtatar Milliy Meclisi Aqmescitniñ şeer memuriyetine 1944 senesi mayıs 18 künü qırımtatar halqı genotsidiniñ qurbanlarınıñ hatırasına matem mitinginiñ keçirilmesi aqqında haber etkenini bildirgen edi.

Keçken senes ananeviy matem mitinginiñ Aqmescit merkezinde keçirilmesi yasaq etilgen edi.

XS
SM
MD
LG