«Qırım» Fondu» Hayriye teşkilâtınıñ mal-mülki Qırım musulmanları Diniy idaresine berilmek kerek, dep tüşüne Milletlerara munasebetler ve sürgün olunğan grujdanlarnıñ işleri boyunca Devlet komitetiniñ reisi Zaur Smirnov.
Bunı o «Rossiya segodnâ» radiosınıñ yayınında ayttı.
«Fondnıñ bütün mal-mülki qırımtatarlar, şu cümleden çetelde yaşağan diaspora azalarınıñ parasına satın alınğan edi. Epimiz bilemiz, «Qırım» Fondunıñ» tesisçisi Mustafa Cemilev ola, menim fikirimce, cemaat parasına alınğanlar bir adamğa ait olsa, adaletsiz olacaqtır», – dedi Smirnov.
«Bizler baş nazir muavini Ruslan Balbev ile Cumhuriyetniñ yolbaşçısı Sergey Aksenovğa muracaatta bulunıp, bütün mal-mülkni Musulmanlarnıñ diniy idaresine bermege teklif ettik. Bugünki künde – o, qırımtatarlarnıñ menfaatlarını temsil etken yekâne organdır», – dep ayttı o.
Smirnovnıñ aytqanına köre, uquq qoruyıcılar «Qırım» Fonduna ait olğan obyektlerniñ maqsadına köre qullanılmasını teşkereler, bundan soñra bu vaziyetke qıymet kesecekler.
Aqmescitiñ merkezinde Fond binalarından birinde yerleşken «Qırım» Fondu» HT ya da Qırımtatar Milliy Meclisiniñ reberligi Qırım akimiyetiniñ bu teşebbüsini şimdilik izaatlamadılar.
Malüm olğanı kibi, Qırımnıñ Arbitraj mahkemesi Qırımtatar Milliy Meclisi yerleşken «Qırım» Fonduna ait binanı medeniyet mirasınıñ obyekti olaraq Rusiye devletine bermege qarar aldı.
Bundan evel tintüv ve mahkemeler olğan edi. «Qırım» Fondu» Hayriye teşkilâtınıñ müdiri Riza Şevkiyevni 350 biñ ruble, fondnı ise 4,5 million rublege cezaladılar.
Aprelniñ soñunda Qırımnıñ Rusiye ükümetiniñ medeniyet mirasını qoruv devlet komiteti reisiniñ birinci muavini Vâçeslav Zarubin bildirdi ki, fond para cezasını ödemedi, bu sebepten raqam «eki qat 9 million rublege qadar arta bile».
