Moskvanıñ Basman mahkemesinde çarşenbe künü, mayıs 6-da, ukrain arbiyi Nadejda Savçenko içün acele yardımnı çağırdılar.
Nadejda Savçenkonıñ adliyecisi Twitterde bildirdi ki, Savçenko yaramadı ve yürek ağrısından şikâyet etti.
Bu sebepten mahkemede teneffüs ilân etildi. Moskvanıñ Basman mahkemesi taqiqatnıñ Savçenkonıñ apis cezasını iyün 30-ğa qadar arttırmaq muracaaatını baqa.
Berilgen malümatqa köre, Moskvanıñ Basman mahkemesi mayıs 6-da Rusiyede apiste bulunğan Nadejda Savçenkoğa Ukraina delegatı olaraq Avropa Şurası Parlament assambleyasınıñ (PACE) sessiyasında iştirak etmege izin bermegen taqiqatçınıñ areketlerini qanunğa uyğun kibi tanıdı.
Nadejda Savçenko keçken seneniñ iyül ayından itibaren Rusiye apishanesinde buluna. O, qabaatını red etip, separatistler tarafından esir alınğanını ve Ukrainadan Rusiyege qanunsız alda çıqarılğanını bildire.
Oktâbr 26-da olıp keçken Ukraina Yuqarı Radasınıñ nevbetten tış saylavlarında Savçenko «Batkivşçına» firqasınıñ cedvelinde birinci yerde edi ve sekizinci çağırılış Ukraina parlamentiniñ halq deputatı olaraq saylandı. Rada onı PACE eyyetiniñ erkânına kirsetti.
Mart 16-da ukrain uçucısı SİZOda açlıqqa tekrar başladı.
