Mayısnıñ ortasında Qaraçay-Çerkeste «Çerkessk-Yalta» yolu açılacaq. Bunı Qaraçay-Çerkesniñ turizm, kurort ve gençlik siyasetiniñ nazir muavini Pavel Selipetov bildirdi, – dep haber ete TASS.
Onıñ aytqanına köre, Rusiye Naqliyat nazirligi bu marşrutnı tasdıqladı. Selipetovnıñ fikirince, Qırım ve Qaraçay-Çerkes arasında turistlerniñ sayısı artacaq, ve «sakinlerniñ regionlarnıñ turistik imkânlarına qıymet kesmek fursatları peyda olacaq».
«Qaraçay-Çerkes cumhuriyeti Qırım sakinleriniñ merağını doğura. Bu dağ lıja mevsiminde bu regionnıñ 500 turisti cumhuriyetni ziyaret etti. Tam bir malümat şimdilik yoq, çünki adamlar taqımlarğa şekillenip raatlanmağa barmaylar», – dep qayd etti memur.
Onıñ aytqanına köre, mayıs 7-de Nijniy Arhız kompleksinde Aqmescitke qadar mesafeni kösterecek işart tiklenecek.
«Tedbirde Qırımnıñ turistik gruppası iştirak etecek. Bu işaretniñ yañı marşrutqa alâqası yoq, amma cumhuriyetlerimizni yaqınlaştıra», – dep tüşüne Selipetov.
2014 senesi sentâbr ayında «Soçi 2014» forumında Qırım ve Qaraçay-Çerkes eki taraflı işbirligi aqqında añlaşmanı imzaladılar. Dekabr ayından itibaren Aqmescitte Qaraçay-Çerkes malümat merkezi çalışa.
