Moskvanıñ Basman mahkemesi mayıs 6-da Rusiyede apiste bulunğan Nadejda Savçenkoğa Ukraina delegatı olaraq Avropa Şurası Parlament assambleyasınıñ (PACE) sessiyasında iştirak etmege izin bermegen taqiqatçınıñ areketlerini qanunğa uyğun kibi tanıdı.
Böylece, mahkeme Lugansk civarında elâk olğan eki Rusiye jurnalistiniñ ölümine alâqası olğanında qabaatlanğan ukrain arbiyiniñ imayesi bergen şikâyetini qabul etmedi.
Mahkemede Savçenkonıñ adliyecisi İlya Novikov dedi ki, Savçenko PACE delegatı olaraq taqip etilmemeli ve azat etilmeli. Taqiqatçınıñ aytqanına köre, Savçenkonıñ cinayeti, yaqalavı ve apiske alınması onıñ PACE delegatı olğanından evel oldı, bu sebepten ceza deñiştirilmeycek.
Nadejda Savçenko keçken seneniñ iyül ayından itibaren Rusiye apishanesinde buluna. O, qabaatını red etip, separatistler tarafından esir alınğanını ve Ukrainadan Rusiyege qanunsız alda çıqarılğanını bildire.
Oktâbr 26-da olıp keçken Ukraina Yuqarı Radasınıñ nevbetten tış saylavlarında Savçenko «Batkivşçına» firqasınıñ cedvelinde birinci yerde edi ve sekizinci çağırılış Ukraina parlamentiniñ halq deputatı olaraq saylandı. Rada onı PACE eyyetiniñ erkânına kirsetti.
Mart 16-da ukrain uçucısı SİZOda açlıqqa tekrar başladı.
Çarşenbe künü Basman mahkemesi taqiqatnıñ Nadejda Savçenkonıñ apis cezasını iyün 30-ğa qadar arttırmaq muracaatını baqacaq, dep bildirdi mahkemeniñ matbuat kâtibi Anna Fadeyeva.
