Link açıqlığı

Minskte üç taraflı kontakt gruppasınıñ körüşüvi keçirilmekte – Aqrusiyeniñ Tış işler nazirligi


Aqrusiyeniñ Tış işler nazirligi bildire ki, Minskte Donbass vaziyeti boyunca üç taraflı kontakt gruppasınıñ körüşüvi başladı.

Aqrusiye nazirliginiñ malümatına köre, körüşüv qapalı olacaq ve kütleviy haber vastaları içün tedbirlerniñ keçirilmesi planlaştırılmay.

Körüşüvde OSCE vekili Heidi Tagliavini, Ukraina temsilcisi Leonid Kuçma ve Rusiye temsilcisi Azamat Kulmuhametov, em de «DNR» ve «LNR» vekilleri iştirak etecekler.

Separatistlerniñ saytlarında olarnıñ vekilleri Minsk muzakerelerine kelip çıqqanını tasdıqladılar.

Bu künleri «DNR» vekillerinden biri Andrey Pürgin bildirdi ki, separatistlerniñ liderleri kontakt gruppasınıñ toplaşuvında iştirak etmeycekler.

«Minskte taqımlar seviyesinde iş esnası başlaycaqtır. Bu sebepten anda «DNR» ve «LNR» yolbaşçıları degil de, vekâletli temsilci ve ekspertleri yol aldılar. «DNR» tarafından Kontakt gruppasınıñ resmiy vekili Denis Puşilin, ve daa onğa yaqın insan baracaq», – dep ayttı Purgin mayıs 5-te.

Kontakt gruppasındaki Ukraina temsilcisi Leonid Kuçmanıñ matbuat kâtibi Darya Olifer dedi ki, kontakt gruppası Minsk añlaşmasınıñ havfsızlıq, siyaset, iqtisadiyat taqımlarınıñ işini başlatmaq istey.

Ukraina prezidentiniñ memuriyeti bildire ki, Donbass vaziyeti boyunca üç taraflı kontakt gruppasınıñ işçi taqımlarında Ukrainanı Vladimir Gorbulin, Yevgeniy Marçuk, İrina Geraşçenko ve İgor Yeremey temsil etecekler.

XS
SM
MD
LG