Link açıqlığı

Qırımda kontslager mabüslerine memorialnı gece-kündüz quralar


Aqmescit rayonı Saraylı Qıyat köyünde kontslager mabüslerine «Qızıl» memorialınıñ qurucılığını mayısnıñ 8-ne qadar bitirip olamay bileler. Tantanalı açılışı mayıs 9-na planlaştırıla.

Bunı Qırım.Aqiqat mühbirine işbu kompleksniñ quruculığı ile oğraşqan teşkilât hadimi bildire.

«Bir aydır, tatil ve bayramlarnı körmeyip, çalışamız. Obyektni müddetinde taqdim etmelimiz. Amma mayıs 9-na bir qaç kün qaldı, qurucılıq işi ise daa bitmedi. İnsanlar da endi boldurğanlar», – şikâyet ete adam.

Şimdilik mında damnıñ qoyulması ile oğraşalar. Memorialğa qasaba kirişinden yolnı qoyalar. Bundan sebep, deyler yerli sakinler – şeerge tarlalardan keçmege mecburlar.

«Merkeziy yolnı qapattılar, asfalt qoyalar. Şimdi qasabadan çıqmaq içün ya tarlalardan, ya diger soqaqlardan keçmege kerek, ama soqaqlarda er vaqıt tıqanıqlıq, onıñ içün tarlalardan keçmege daa da qolay, toz çoq olsa da», – tarif ete Qırım.Aqiqatqa yerli sakin Sergey.

Digerler yañı yol ve keçitler sebebinden quvançını bildireler.

«Böyle yol mında çoqtan yoq edi. Bu quruculıqnıñ başlanması eyidir. Endi em maşina, em piyadeler içün yollarnıñ vaziyeti yahşı olur», – dey yerli sakin Anastasiya.

Memorialnıñ qurucılığı bıltır yazda başlandı. 1942 senesi baar ayından 1944 senesi barine qadar, çeşit malümatqa köre, 8-15 biñ insan öldürilgen edi.

XS
SM
MD
LG