Qırımtatar Milliy Meclisi Aqmescitniñ şeer memuriyetine qırımtatar halqınıñ genotsidi – 1944 senesi mayıs 18 künü sürgünligiqurbanlarınıñ hatırasına matem mitinginiñ keçirilmesi aqta bildirüvni taqdim etti. Bu aqta Meclisniñ matbuat hızmeti mayıs 5 künü Facebook saifesinde bildire.
Matem mitingini Kiyevskaya soqağından Salğır özenine qadar uzanğan Qırım cumhuriyet Zenaat birligi Sarayı territoriyasınıñ cayav zonası boyunca keçirecek olalar.
Tedbir iştirakçileriniñ tahminiy sayısı – 5000 insan. Matem mitinginiñ keçirilüvinde yalıñız qırımtatar timsalleriniñ qullanılacağı nazarğa alına.
«Matem mitinginiñ işbu yerde keçirilmesi obyektiv sebeplerden imkânsız olsa, Qırımtatar Milliy Meclisi planlaştırılğan tedbirniñ keçirilüv yeriniñ deñiştirilmesi aqta olğan tekliflerni baqıp çıqmağa razıdır», – denile beyanatta.
Mayıs 3 künü Qırımtatar Milliy Meclisiniñ nevbetteki toplaşuvında Qırımda hatıra tedbirleriniñ keçirilmesi aqta qarar alınğan edi.
Mayıs 18 künü – Qırımdan qırımtatar halqınıñ sürgünligi qurbanlarınıñ hatıra künüdir. Bu künü 1944 senesi Orta Asiyağa yarımadadan qırımtatarlarnıñ ilk eşelonı yollanıldı.
Qırım işğalinden evel Aqmescitte sürgünlik yıllığına er sene Bütünqırım matem mitingi keçirile edi. Mında on biñlerce insan iştirak ete edi.
