Qırımda Ekinci cian cenkinde ğalebeniñ 70 yıllığı munasebeti ile yapılğan bütün Rusiye amnistiyası 160 mabusnı azat ete bile, dep haber ete Krım.Media.
Agentlik bildire ki, terbiye apishanelerinde bulunğan 143 vatandaş, ve SİZOda bulunğan 17 kişi aqqında laf kete. Al-azırda mabuslarnıñ şahsiy işleri ögrenilmekte ve afu aqqında meseleniñ baqılması içün vesiqalar azırlanılmaqta.
Qırımda UFSİN Rusiye hızmetiniñ malümatına köre, kiçik ve orta cinayet yapqan adamlar, beş yılğa qadar azatlıqtan marum etilgenler, diqqatsızlıqtan cinayet yapqanlar, em de apis cezasından bir yıldan az qalğanlar afu etile bile.
Büyük cinayetler (öldürüv, terrorizm, ekstremizm, narkotik ile bağlı areketler, çağına yetmegenlerge qarşı cinayetler) yapqanlar afu etilmeycek, dep bildire hızmet.
Aprelniñ soñunda Rusiye Devlet Duması Ulu Vatan cenkinde Ğalebeniñ 70 yıllığı ile bağlı amnistiyanı ilân etmege qarar aldı. Rusiye prezidenti Vladimir Putin bu qararnı baqtı. İlk malümatlarğa köre, 260 mabusqa qadar afu etile bile.
