Yaqın vaqıtta Aqmescitte yarımadağa ukrain tili ve medeniyetini qaytaracaq «Ukrain medeniyet merkezi» taqdim etilecek. Bunı Qırım faali Leonid Kuzmin bildirdi.
«Soñki yıl devamında Qırımdaki vaziyet bam-başqa oldı. Qırım Rusiye Federatsiyasına kirgen soñ Qırım ukrainleri tarihiy vatanından uzaq qaldılar. Qıtaiy Ukraina ile daimiy medeniyet, til, tarih bağları qalmağan soñ ukrainler assimilâtsiyağa oğratılıp, özüni tanıtıp olamaylar», – dep yaza faal Facebookta.
Onıñ qayd etkenine köre, Qırımda ukrainlerniñ teşebbüs gruppası «Qırım yarımadasında yaşağan ukrain halqını birleştirecek» merkezni meydanğa ketirmege başlay.
Kuzminniñ bildirgenine köre, bu merkezniñ esas maqsadı – Qırımda ukrain medeniyetiniñ inkişafı, ukrain tiliniñ ğayrıdan tiklenmesi ve Qırım mekteplerinde ögrenmesi, Ukraina ile medeniyet, içtimaiy bağlarnıñ tiklenmesi ve Qırımnıñ milliy cemiyetleri ile bağ.
«Ukrain medeniyet merkezi faal adamlarğa ümüt ete. UMM – cemaat teşkilâtı ve bizler er angi işbirligine azırmız», – dep qayd ete faal.
Leonid Kuzmin – ukrain şairi Taras Şevçenkonı añma aktsiyasında mart 9-da Aqmescitte yaqalanğan faallerden biri.
Malüm olğanı kibi, faalller Aleksandr Kravçenko, Leonid Kuzmin ve Veldar Şukurciyev mart 9-da ukrain şairi Taras Şevçenkonı añma tedbirinde yaqalanğan ediler.
Mart 12-de mahkeme olıp keçti, faallerniñ ukrain timsallerini qullanğanlarından sebep cezası belgilendi. Mahkeme er bir faalni 40 saatlik mecburiy işler ile cezaladı.
Aprel 17-de Aqmescitte Kuzminni köteklediler. O, politsiyağa muracaat etti.
