Bağçasaray rayonıñ Tav Badraq köyünde (Skalistoye) camini ateşke berüv ıntıluvı boyunca cinaiy iş açıldı, dep haber ete Qırım musulmanları Diniy idaresiniñ matbuat hızmeti İçki işler nazirliginiñ Qırım idaresine esaslanıp.
Matbuat hızmeti qayd ete ki, al-azırda bir sıra taqiqat tedbiri keçirilmekte.
Malüm olğanı kibi, aprel 25-ten 26-na keçer gecesi cami binasına yanıcı qarışma ile şişeler atıldı. Cami büyük zarar körmedi. Bu cami üç yaqın köyge hızmet etmekte.
2014 senesi noyabr 12-de Sudaq rayonınıñ Qoz köyünde (Solneçnaya Dolina) camini ateşke bermek istediler. Cinayetçiler alâ daa tapılmadı, dep bildire QMDİ.
