Cumaertesi künü, mayıs 16-da, qırımtatar halqınıñ genotsid qurbanlarınıñ añma tedbirleri çerçivesinde «Çatırdağ seferi 2015» aktsiyasınıñ keçirilmesi planlaştırıla. Bunı Qırımtatar Milliy Meclisi bildirdi.
«Tedbir maqsadı Qırım gençleriniñ Qırımnıñ eñ yüksek dağlarından biine çıqıp, sürgünlikte ölgenlerni dua ile añmaq ve milliy gimnni icra etmektir», – dep aytıla haberde.
Meclis hatırlattı ki, «Çatırdağ seferi» 2010 senesinden itibaren gençler tarafından keçirilgen ananeviy aktsiyadır. Genç nesilniñ temsilcileri yarımadanıñ farqlı köşelerinden kelip, 1944 senesi sürgünliginiñ qurbanlarını añalar.
Bu sene 2-3 biñ insannıñ qoşulması beklenile.
Aktsiya iştirakçileri cumaertesi künü, mayıs 16-da, saat 8:30-da Anğara boğazında toplaşalar. Saat 9:00-da sefer başlana. Tedbirni Qırımtatar Milliy Meclisi, Qırım musulmanları diniy idaresi, qırımtatar cemaat ve gençler teşkilâtları teşkil etmekte.
Qırımtatar Milliy Meclisiniñ azası Seydamet Yağyayev QHA agentlige bildirdi ki, aktsiyanıñ iştirakçileri bu tedbirniñ keçirilmesine daa ruhset almadılar, lâkin buña bir kimse keder etmeycegine eminler.
«Mence, cemaat olğan yerlerde keçirilmegen tedbirni ötkermege izin berirler. Çünki cemaat çoq olğan yerde toplaşmağa yasaq eteler. Tedbir anane oldı, ruhset vesiqalarına da acet yoq. Fevqulâde vaziyetler hızmeti qurtarıcı hızmetiniñ qaydı ve qoruq reberliginiñ izni kerek», – dep qayd etti Yağyayev.
