Link açıqlığı

Mayıs 3-te Bağçasaray rayonında Qırım akimiyetiniñ teşebbüsi ile keçirilgen «Hıdırlez» milliy bayramında qırımtatarlarnıñ büyük qısmı iştirak etmedi.

Aqmescit sakinleri arasında keçirilgen sorav neticeleri kösterdi ki, qırımtatarlar cumhuriyetniñ akimiyeti ile razı olmayıp, «Hıdırlezge» barmadılar.

«Qırımnıñ bu reberligi teşkil etken tedbirlerde iştirak etmek istemeyim», – dep ayttı biri.

Bundan ğayrı, Qırım.Aqiqatnıñ malümatına köre, Yalta, Sudaq, Aluşta ve Aqyar eyyetleri «Hıdırlezde» iştirak etmekten vazgeçtiler.

Qırım.Aqiqat bildirgeni kibi, bazar künü, mayıs 3-te, «Şaherezada»medeniy-eglence merkeziniñ yanında (Bağçasaray rayonı, Aqmescit – Bağçasaray yolunıñ 25-inci kilometri) Qırımnıñ Rusiye akimiyetiniñ teşebbüsi ile «Hıdırlez» qırımtatar bayramı qayd etildi.

Qırım akimiyeti bildire ki, bu sene bayram 35-40 biñ insannı topladı.

Tedbirni teşkil etmegen Qırımtatar Milliy Meclisi 5-6 biñ kişi aqqında haber ete. Temsil organı Qırımdaki «Hıdırlezge» barmamağa çağırdı.

XS
SM
MD
LG