Link açıqlığı

Eski Qırımnıñ akimiyeti musulman mezarlığını yoq ete


Bazarertesi künü, mayıs 4-te, Eski Qırımnıñ (İslâm-Terek rayonı) kommunal hızmetleri yañı musulman mezarlığında qoyulğan qoranı yıqmağa başladılar. Bunı Eski Qırım şeeriniñ «Vatan» din cemiyetiniñ reisi Rasim Sadredinov Qırım.Aqiqatqa bildirdi.

Onıñ aytqanına köre, yerli akimiyet bu topraq damartısınıñ mezarlıq içün ayırılması aqqında añlaşqan edi. «Şimdi er şey keri alındı. Prokuraturanıñ qararı bar, mında keçirilgen bütün tedqiqler yañlış eken. Devletke kirmegen organlar mezarlıq qurucılığına ruhset vesiqalarını berdiler. Mahkeme qararı bar, o, mezarlıqnı kenişletmege yasaq etti», – dep ayttı musulman cemiyetiniñ reisi.

Sadredinovnıñ malümatına köre, nezaret organları bu yerniñ topraq altındaki suvlar suv anbarına kete, dep netice çıqardılar. «Mezarlıqtan mesken yerine qadar 300 metr bar, mezarlıq içün yerni ayırğan ukrain qanunlarınıñ qaidelerine uya. Rusiye qanunlarına köre eñ azından 250 metr kerek – bütün normalarğa uyğun», – dep qayd etti o.

Onıñ fikirince, bu mesele «siyasetnen bağlı». «Bir şey yapacaq olsaq, soñki bir qaç yıl devamında qarşı areketlerni köremiz», – dep ayttı Sadredinov.

Bundan ğayrı, onıñ bildirgenine köre, mezarlıqta eski mezarlar bar. Kommunal hızmetler mezarnı ya mında qaldırmağa, ya da başqa yerge keçirmege teklif eteler.

«Cemaat açuvlı, adamlar öz parasını masraf etip, o qadar şeyni yaptı», – dep şikâyet etti o.

Musulman cemiyetiniñ reisi bildirdi ki, mezarlıq meselesi «10 yıl devamında muzakere etilmekte». «Adamlarnı kömecek yer yoq. Eski mezarlıqnıñ köşelerinde defn eteler, amma o da qoruv yerinde buluna. Anda suv yedegi bar, anda kömmege mümkün degil», – dep ayttı Sadredinov.

Onıñ bildirgenine köre, akimiyet şeerniñ tışında yer almağa teklif ete, lâkin cemaat buña razı degil.

Qırım musulmanları Diniy idaresi şimdilik vaziyetni izaatlamadı.

XS
SM
MD
LG