Ukraina tarafdarı Qırım faali ve blogeri Yelizaveta Bogutskaya Qırımda FSB idaresinden sorğuğa davetni elde etti. Bunı Kiyevde yaşağan Bogutskaya öz Facebook saifesinde bildirdi.
Bogutskaya, FSB cevaplarına esaslanıp, Qırım kirişi yasaq olmağanı ve oña nisbeten cinaiy işlerniñ olmaması aqqında bildire.
«Rusiye FSB idaresinden ufaq arifler ile yazılğan mektüpler menim içün Qırımğa kiriş yasaq olmağanı aqta bildire. Moskvadan kelgen biri FSBde maña qarşı cinaiy iş yoq olğanı aqqındadır. Yaqında Qırım FSB mektübi keldi, sıñırdan qolay keçe bilem eken, Qırımda da maña iç bir telüke yoq, sanki», – dey Bogutskaya.
Bazar künü, mayısnıñ 3-de, Aqmescitte ev adersi boyunca oña FSB mektübi keldi. Blogerni Ekstremizmge qarşılıq merkezine sorğuğa çağıralar: «Tünevin ise meni baş taqiqatçı Ekstremizmge qarşılıq merkezine sorğuğa çağırğanı aqta bildirgen mektüp kelip çıqtı».
Bunıñ ile Bogutskaya, yaqalana bileceginden saqınıp, taqiqatçığa barmaycaq ola. «Tüşündim ki: poçtadan mektüplerni almağa daa da havfsızdır. Aks alda ellerim kelepçelerge alına bile. Belki, daima olğanı kibi, abartam. Amma aç ayvannı açuvlatmağa kerekmey dep tüşünem. Em de olar içün men – çetel vatandaşı olam. Mında, Kiyevde, körüşmege razım».
Hatırlatamız, bıltır sentâbr ayında Yelizaveta Bogutskaya altı saat devam etken sorğu ve tintüvden soñ Qırımnı terk etti.
