Link açıqlığı

Qırımğa kirmek içün maşinalar 12 saat «Çonğarda» bekleyler


Qıtaiy Ukrainadan Qırımğa kirecek olğan maşinalarnıñ nevbeti cuma künü, mayıs 1-de, bayağı arttı, – dep haber ete Qırım.Aqiqat. Şaatlarnıñ aytqanına köre, bayram künleri Qırım sıñırından keçmek içün 12 saat beklemek kerek.

«Şimdi Qırımdan çıqtım, 1,5 saat içinde eki sıñırdan keçtim. Qırım kirişinde tünevin olğanı kibi, 12 saatlik, nevbet. Daa diqqatlı baqalar, amma problemsiz», – dep ayttı Qırımdan qıtaiy Ukrainağa mayıs 1-de saba kirgen qırımlı Qırım.Aqiqatqa.

Onıñ bildirgenine köre, Qırımda qıtağa çıqacaqlarnıñ nevbeti qıtaiy Ukrainada olğan nevbetten az.

Qırımlılarnıñ aytqanına köre, aprel 30-dan mayıs 1-ge keçer gecesi memuriy sıñırdaki vaziyet eñ qıyın edi.

«Bizler Qırımğa soy-soplarımızğa aprel 30-da barğan edik, olarğa mayıs bayramlarına baracaq edik. Nevbette üç yüzünci oldıq. Memuriy sıñırnıñ ukrain qısmında bir buçuq saat içinde yalıñız 40 metrni keçip oldıq. Yanımızğa bir genç keldi ve 500 grivnağa kolonnanıñ başına keçmege teklif etti. Ukrain sıñırcıları bunı bilelermi aceba?», – dep ayttı Qırım.Aqiqatqa Tatyana adlı qırımlı.

Şaatlarnıñ aytqanına köre, nevbette ukrain nomeraları ile maşinalar çoq, Qırımğa farqlı mallarnı alıp ketken yük maşinalar da bar.

Ukraina Devlet sıñır hızmetinde bildirdiler ki, mayıs bayramları Ukraina pasportı olğan adiy adamlar Qırımdan qıtaiy Ukrainağa raat-raat kire bileler.

Ukraina içki işler naziri Arsen Avakov bir qaç kün evelsi dedi ki, işğal etilgen yarımadada Rusiye vesiqalarını alğan adamlar mayıs bayramları Qırımdan qıtaiy Ukrainağa kiremezler. Faqat Rusiye pasportını alğan er bir qırımlı ya da Rusiye vesiqaları boyunca qıtağa kirecekler kiremezler öyle de añlaşılmadı.

XS
SM
MD
LG