Mayıs 1-de Kezlev kurort mevsimini açtı. Qırım şeeriniñ merkezinde «Edebiy Kezlev» paradı olıp keçti. Rusiye Federatsiyası qayd etken Edebiyat yılına bala şifahanesi de qoşuldı.
Qırım.Aqiqatnıñ mühbiri bildire ki, Kezlev sakinleri meşur edebiyat sımaları Lev Tolstoy, Anton Çehov, İlya İlf ve Yevgeniy Petrovğa çevirildiler.
Kezlevde raatlanğan yazıcı ve şairler, şu cümleden Lesâ Ukrainka, Vladimir Mayakovskiyniñ adları seslendirildi. Boris Balter ve Viktor Tsoynı da añdılar.
Bayramnıñ alıp barıcısı turistlerni Kezlevge raatlanmağa davet etip, mında Gerakl birinci olıp raatlanğanını tahmin etti.
On biñ adamnı toplağan parad üç saatten ziyade devam etti. Frunze parkından başlap Teatr meydanına qadar bala bağçaları ve mekteplerniñ talebeleri, ekim ve ocalar, şifahane ve şeer müessiseleriniñ hadimleri, genç sportçı ve ressamlar, oyuncılar yürip keçti.
Bayramda şeerniñ milliy cemiyetleri de iştirak etti: rus, ukrain, yeudi, qırımçaq, qaray, yunan, belorus ve almanlar.
Bir çoq adam renkli bayraqlar ile keldi. Adamlar Rusiye ve Qırım bayraqlarını köterdiler, Rusiye Federatsiyasınıñ prezidenti Vladimir Putinniñ fotosüreti de bar edi.
Siyasiy firqalarnıñ timsalleri olmadı. Paradnı bir qaç biñ adam seyir etti.
