Link açıqlığı

Kiyevde kommunistlerniñ mitinginde militsiya betini saqlağan 19 insannı yaqaladı


Ukraina içki işler nazirliginiñ Kiyevdeki idaresi Ulu Vatan cenkiniñ müzeyi yanında keçirilgen aktsiyada 19 adam yaqalanğanını bildire.

«Saat 11:20-de bir qaç on insan tedbirlerniñ iştirakçileri ile qavğa etmege tırıştılar. Uquq qoruyıcılar zıddiyetni al ettiler», – dep bildire Kiyev militsiyası.

Yaqalanğanlarnı qabaatını belgilemek içün militsiyanıñ rayon bölügine alıp kettiler, – dep ayttılar militsiyada.

Radio Svoboda mühbiri bildire ki, içki işler nazirliginiñ hadimleri gençlerni müzey kirişinde toqtattılar. Olarnıñ çoqusı betini qapatqan edi. Bir qaçınıñ qolunda Ukraina ve «Svoboda» firqasınıñ bayraqları bar edi.

İçki işler nazirliginiñ hadimlerinden biri Radio Svobodağa bildirdi ki, uquq qoruyıcılar miting telükesizligini nezaret eteler.

«Bizler nizamnı nezaret etken uquq qoruyıcılarmız. Mefküre farqları», – dep ayttı o ola bilecek provokatsiyalarnıñ sebeplerini añlatıp.

Maskalarnı kiygen gençler kamerağa betini köstermek istemediler. Olardan biri, tahminen 16 yaşında genç dedi ki, uquq qoruyıcılardan qorqa, çünki «olar onı qıdıracaqlar».

«Men veteranlarnı añmağa keldim», – dedi o.

Militsiyanıñ malümatına köre, kommunistler teşkil etken mitingge tahminen biñ kişi keldi. Aman-aman 6,5 biñ uquq qoruyıcı nizamnı közetmekte. Ukraina Kommunistler firqası Kiyev şeer devlet memuriyetine muracaat etip, mayıs 1-de Hreşçatikte Halqara emekliler birdemliginiñ kününe bağışlanğan tedbir keçirilmesi aqqında ariza berdi. Militsiya reberligi Kiyevniñ merkezinde balalar içün eglenceler olacaq dep, teşkilâtçılarğa tedbirni başqa yerde keçirmege teklif etti.

Böylece, aprel 30-da Medeniyet nazirligi KŞDM cemaat bağları departamentine kommunistlerniñ mayıs 1-de müzeyde tedbir keçirilmesine izin bermedi. Kommunistlerniñ lideri Petr Simonenko miting qanun çerçivesinde keçirilgenini bildire.

XS
SM
MD
LG