Qırım İçki işler nazirliginiñ ekstremizm ile küreş merkeziniñ hadimleri erkekni «Azov» göñülliler batalyonınıñ azası olğanını tüşünip yaqaladılar. Onı Aqmescitte camini ateşke berüv ve Qırım prokuraturasınıñ binası yanında terroristik akt yapmaq ıntıluvında şekleyler.
«Cumhuriyetniñ ilk taqiqat organları faşistlerniñ tarafdarı olğan ve Ukraina Cenüp-Şarqında silâlı zıddiyette «Azov» göñülliler batalyonınıñ terkibinde iştirak etken şahısnı taptılar, bu adam keçken sene yazda Aqmescit şeerinde «Çuqurça» camisiniñ binasını ateşke bergen edi. Bundan soñra Qırım cumhuriyetiniñ prokuratura binası yanında terroristik areketlerni yaptı», – dep aytıla beyanatta.
Cumhuriyetniñ prokurorı Natalya Poklonskaya şahsen cinaiy işniñ taqiqatını nezaret etmekte.
Şeklengen şahıs yaqalandı ve onı apiske aldılar.
Prokuraturanıñ matbuat hızmeti qayd ete ki, Qırımda prokuror Natalya Poklonskayanıñ reisligi altında toplaşuv olıp keçti. Muşaverede terroristik areketlerniñ yapılmasına alâqası olğan adamlarnı tapmaq maqsadı ile keçirilecek bir sıra tedbir keçirilmesi planlaştırıldı.
