Aqmescit ve Aqyar Emekdar kününi sovet ve Rusiye adetlerine köre qayd ettiler.
Aqmescitte, mayıs 1 künü, saat 10:00 Kirova caddesi ve Samokiş soqağından Sovet meydanına qadar bayram yürüşi keçti. Şeer merkezinde naqliyat areketi qapatıldı. Yürüş keçirilgen territoriyanı uquq qoruyıcı organları sarıp aldı. Lenin meydanındaki baş minberinden icadiy taqımlar, şeer ve cumhuriyet şirketleriniñ, icraiy akimiyet organlarınıñ hadimleri keçip kete ediler. Medeniyet Nazirligi kolonnası başında kabriolette oturğan II Yekaterina ve knâz Potömkin kete edi.
«Pek yahşı numayış, insan ğayet çoqtır. Er kes quvana, kün de baar, mayıs, emekke kelişe!» – dep paylaşa öz teessuratları ile yerli sakinlerden biri.
Bala taqımlarınıñ iştirakçileri kökke Rusiye bayrağı tüsünde kürreçiklerni yolladılar.
Qırım yolbaşçılığı etrafından demir qoruları pekitildi. Mayıs bir künü numayış kollonaları yürgen şeer soqaqları politsiya tarafından sarılğan edi. Bu zonağa yalıñız metallodetektorlardan keçmek mümkün edi.
Симферопольский Первомай (фотогалерея)
Aqyarda mayıs 1 künü Halqara emekdar Kününe bağışlanğan kütleviy tedbirde emek taqımları, cemaat birlikleri ve cemaat teşkilâtları, tasil müessiseleriniñ temsilcileri iştirak etti.
Yurüşniñ başında şeer başı Sergey Menâylo, yerli parlament spikeri Aleksey Çalıy, ve qanun çıqarıcı, icraiy akimiyetniñ diger vekilleri ketmekte edi.
Er bir kolonnanı «Emekke şüret, arqadaşlar!» şiarı ile qarşılay ediler.
Yürüşte vatandaşlıq tehnikası da iştirak etti: yanğın ve qurtarıcı maşinalar, troyelleybus ve «acele yardım» maşinası.