Qırımnıñ Ukrainağa qaytarıluvı ile cenk biter, – dedi Ukraina prezidenti Petro Poroşenko STB telekanalına aprel 30 künü, haber ete Qırım.Aqiqat.
«Qırım ve Donbassnıñ Ukrainağa qaytarıluvı ile cenk biter», – dedi Poroşenko, ve Ukraina bu sualde başqa bir tekliflerge razı olmaycağını bildirdi.
O şunı da qayd etti ki, buña, belki de, bayağı vaqıt kerek olur ve öz şimaliy qomşusı ile nice yıllar devamında cenk şaraitlerinde yaşağan Cenübiy Koreya misalini ketirdi.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
