Qırımda, işğal şaraitlerinde, içtimaiy, iqtisadiy, medeniy aqlarına riayet etilmesi imkânsızdır, – dedi Qırımtatar Milliy Meclis reisi Refat Çubarov BMT Tamır halqları meseleleri boyunca Daimiy Forumınıñ XIV sessiyasında, haber ete Qırım.Aqiqat.
Sessiya toplaşuvında Qırımtatar Milliy Meclisiniñ eyyeti iştirak ete. Onıñ terkibine Meclis reisi Refat Çubarov, VI çağıruv Qırımtatar Milliy Qurultayınıñ vekili Rustem Ümerov ve AQŞda Meclis ve Qırımtatarlarnıñ Bütündünya kongressiniñ temsilcisi Aylâ Baqallı kire.
Çıqışında Refat Çubarov qırımtatarlarnıñ içtimaiy, iqtisadiy, medeniy aqlarına riayet etilmesine olğan esas mania – Rusiye Federatsiyası tarafından Qırımnıñ işğali olğanını bildirdi.
Qırımtatar Milliy Meclis eyyetiniñ Tamır halqlarınıñ aqları boyunca BMT mahsus arizacı Viktoriya Tauli-Korpus ile körüşüvi BMTnıñ Qırım tamır halqı olğan qırımtatarlarnıñ aqlarına riayet etilmesi boyunca nezaretini muzakere ettiler.
Refat Çubarov qayd etkeni kibi, «qırımtatar halqınıñ bütün aqlarında ayırımı, işğal etilgen Qırımda artqan repressiyalar, Qırımtatar Milliy Meclis azalarınıñ ve qırımtatar milliy areket iştirakçileriniñ sorğuları, Meclis reisi muavininiñ qanunsız sürette apiste bulunması, tintüvler – bu er şey BMT seviyesinde al etilmeli. Qırımda İnsan aqları ve tamır qırımtatar halqınıñ aqları boyunca mahsus halqara eyyetiniñ bulunması lâzim».
Refat Çubarov aytqanı kibi, Qırımtatar Milliy Meclis azaları Kanada, Latviya, Poloniya, Türkiye memleketleriniñ BMT yanında daimiy temsilcikleriniñ başları ile körüşti.
