Link açıqlığı

Qırım müftisi: insanlarnı Hıdırlezge davet etip olamaymız, diniy bayram degildir


Qırım musulmanları diniy yetekçisi hacı Emirali Ablayev

Qırım musulmanları diniy yetekçisi hacı Emirali Ablayev qırımlılarnı mayıs 3 künü Bağçasaray rayonında keçirilecek Hıdırlezge çаğırıp olamağanını bildirdi, çünki bu diniy bayram degildir, amma şunı hatırlattı ki, Hıdırlez – «insanlarğa körüşmek ve qonuşmaq içün fırsat yaratqan milliy bayramdır».

Qırım müftisiniñ beyanatı Qırım musulmanları diniy idaresiniñ saytında cumaaqşamı, aprel 30-da, aşkâr etildi.

«Bugün insanlar bizden soray: Hıdırlez – diniy bayram degil, musulmalar anda barmaq kerekmi? Milliy bayramımız olğanını aytamız, amma dinge alâqası yoq, şunıñ içün biz nasıldır bir qarar çıqarıp, insanlarnı davet etmege ya da yoq kibi meseleni çezip olamaymız, doğru degil. Bayramnıñ temeli halqnıñ tarihında olğanını añlamaq kerekmiz, amma «bayram» degenimizde onıñ dostluq, birlikke çağırğanını köz ögümizge alamız, anda içki, qavğa-şamata degil, saf ve tınç müit olmaq kerek, insanlarğa körüşmege, laf etmege imkân yaratqan müit olmalı, bu ise dinimizge ters kelmey, mında aram şey yoq», – dedi hacı Emirali Ablayev.

O şunı da qayd etti ki, Qırım musulmanları diniy idaresi er vaqıt Qırım musulmanları ve qırımtatarlar ile bağlı tedbirlerde iştirak ete edi.

«Davet etseler, er yerge bara edik, çünki menim içün bu er kesni kene bir kere barışıqqa çağırmaq içün bir imkândır, başqa maqsadım yoq. Diniy idaremiz siyasetke qarışmaycaq, siyasetni siyasetçiler baqsın, ticaretni – iş adamları, dinni – din erbapları, yani Diniy idaremiz», – dep yekün çekti hacı Emirali Ablayev.

Malüm olğanı kibi, Hıdırlezni bu sene mayıs 3 künü, Bağçasaray rayonı, Aqmescit-Bağçasaray yolunıñ 25-inci kilometrinde qayd etecek olalar.

Evel Qırımtatar Milliy Meclis reisi Refat Çubarov qırımlılarğa muracaat etip, Qırım akimiyeti Hıdırlezni qullanıp, qırımtatar halqını bölmege istegenini bildirgen edi. İçtimaiy ağlarda qırımtatar faalleri Qırımnıñ şimdiki akimiyeti tarafından azırlanılğan tedbirlerni körmemezlikke urmağa çağıralar.

XS
SM
MD
LG