Ukraina paytahtında mayıs 18 kününe devlet yolbaşçılığı, cemaat ve siyasiy yetekçileri, Ukrainala çetel memleketleriniñ diplomatik eyyetleriniñ başları, halqara teşkilâtlarnıñ vekilleri, medeniy ve ilmiy erbapları, diniy teşkilâtlarnıñ reberleriniñ iştiragi ile hatıra aqşamınıñ keçirilmesi planlaştırıla. Bu aqta Ukraina medeniyet Nazirligi saytında bildireler.
Qırımtatar halqınıñ sürgünligi 71 yıllığına bağışlanğan tedbirlerniñ keçirilmesi aprel 29 künü ükümet toplaşuvında tasdiqlanıldı.
«Mayıs 15-18 künleri «Epimiz – qırımtatarlarmız» içtimay kampaniyası ve qırımtatar halqınıñ sürgünligi 71 yıllığına bağışlanğan telemarafon keçirilecek. Sürgünlik qurbanları hatıra Kününe bağışlanğan bediiy tedbirler çerçivesinde – Rustem Eminovnıñ «Sürgünlik» toplamından eserleriniñ sergisi ve Taras Şevçenko adına Opera ve balet milliy akademik teatrinde «Unutma» leyhası kösterilecek, Ukraina milliy tarih müzeyinde fotoresim sergisi ve memleket boyunca «Haytarma» filmi kösterilecek», – haber ete Medeniyet Nazirliginiñ matbuat hızmeti.
Mayıs 18 künü Mustaqillik Meydanında qırımtatar halqınıñ sürgünligi qurbanları hatırasına mitingniñ keçirilmesi planlaştırıla.
Qırım.Aqiqat bildirgeni kibi, Ukraina prezidentiniñ qırımtatar halqınıñ işlerinden vekâletlisi Mustafa Cemilevniñ ofisinde mayıs 18 künü Qırım yerli akimiyeti kene sürgünlik qurbanlarınıñ hatırasına tedbirlerni keçirmege yasaq etecegini tüşüneler.
Mayıs 18 künü – Qırımdan qırımtatar halqınıñ sürgünligi qurbanlarınıñ hatıra künüdir. Bu künü 1944 senesi Orta Asiyağa yarımadadan qırımtatarlarnıñ ilk eşelonı yollanıldı.
Qırım işğalinden evel Aqmescitte sürgünlik yıllığına er sene Bütünqırım matem mitingi keçirile edi. Mında on biñlerce insan iştirak ete edi.
2015 senesi Qırımnıñ Rusiye akimiyeti matem tedbirleri yerinde mayıs 18 künü yañı bayram – «quvanç kününi» keçirmek niyetindedir.
