Link açıqlığı

Nariman Celâl: Taqiqat komitetinde fevral 26 künü mitinginde çıqarılğan video boyunca tefsirlerni bekley ediler


Ukraine, Crimea- Dputy Chairman of the Mejlis of the Crimean Tatar people Nariman Jalal, 07Nov2014

Aprel 30 künü Qırım boyunca Rusiye Taqiqat komitetinde Qırımtatar Milliy Meclis azalarınıñ sorğusı keçirildi. Bu sefer taqiqatçılar 2014 senesi fevral 26 künü mitinginde çıqarılğan videodaki adiselerni añlatmağa rica etkenler. Bunı Facebook saifesinde Qırımtatar Milliy Meclis reisiniñ muavini Nariman Celâl bildirdi.

«Taqiqatçılarnı videoda olğan insanlarnıñ areketleri meraqlandırdı, şu cümleden, Ahtem Çiygoznıñ. Onıñ toplanğanlarğa tınçlanıp, ses arttırıcı tehnikasız çıqışta bulunğan Çubarovnı diñlemege rica etkenini añlattım. Ayrı şahıslar bu areketlerni XX asırnıñ 30-40 ss insanlarğa kin beslegen bir Avropa firqasınıñ selâmlaşuv areketi kibi tanıp olur. Matbuat vastaları da miting fotoları boyunca böyle bir teñiştirüvni keçirgen edi. Taqiqatçığa böyle qıymet yañlış olğanını da añlattım», – dey Celâl.

O şunı da bildirdi ki, Taqiqat komitetinde Meclis Kâtibiyetiniñ reberi Dilâver Akiyev ve Qurultay Merkeziy Saylav komissiyasınıñ başı Zair Smedlâyevni de sorğuğa çekip, Qırımtatar Milliy Meclis reisi Refat Çubarovnıñ fevral 26 künü etken çıqışını köstergen ekenler.

«Evelden añlaşılmasaq da, videodaki adiseler aqqında bir türlü cevap berdik. Hamzin, Kürtiyev ve Özenbaş qaldılar. Olarğa da şu videonı kösterecekler, ğaliba. Andaki sımalar tanış, amma bugün olardan birisi SİZOda otura. Digerleri akimiyet tarafından ohşanğan ve sabıq dostlarını aqaretlep yüre», – yaza Celâl.

Hatırlatamız, 2014 senesi fevral 26-da Qırım parlamentiniñ binası ögünde Qırımtatar Milliy Meclisi ve «Rus birliginiñ» bir qaç biñ tarafdarı toplaşqan edi. Tedbirni Meclis reisi Refat Çubarov ve «Rus birliginiñ» lideri Sergey Aksönov teşkil ettiler. Çatışmalar neticesinde eki insan elâk oldı. Rusiye Taqiqat komiteti bundan sebep cinaiy işni açtı.

Onıñ taqiqatı çerçivesinde «kütleviy numayışlarnı teşkil etüv ve iştirak etüvde şeklengen» Qırımtatar Milliy Meclisiniñ reis muavini Ahtem Çiygoz yanvar 29-da yaqalandı. Onı 2015 senesi fevral 19-ğa qadar apiske aldılar, soñra da apis müddetini mayıs 19-ğa qadar arttırdılar.

Aprel 22-de işbu iş boyunca ATR qırımtatar telekanalınıñ operatorı Eskender Nebiyev apiske alındı, bundan evel ise Ali Asanov da apiske alınğan edi.

XS
SM
MD
LG