Roskomgadzor bildire ki, Qırımda 5 qırımtatar telekanalı, 8 qırımtatar radiosı ve 10-dan ziyade qırımtatar neşiri mevcut. Bu aqqında Roskomnadzornıñ ATR telekanalınıñ reberligine bergen cevabında aytıla. Bunı QHA bildire, neşirde vesiqa metni bar.
Roskomnadzor mektübinde aytıla ki, telekanal vesiqalarnı resmiyleştirgende bir qaç kere hata yapqan edi.
«Qayd etmek kerek ki, ATR telekanalı Qırım Cumhuriyetinde yekâne qırımtatar telekanalı degil. 2015 senesi aprel 6 kününe qadar Roskomnadzor ve onıñ territorial idaresi 20 kütleviy haber vastasını qayd etti, olardan 5 telekanal, 8 radio ve 10-dan ziyade neşir Qırım Cumhuriyetinde qırımtatarca faaliyet köstere», – dep aytıla Roskomnadzornıñ reber muavini Viktor Garkavenko imzalağan vesiqasında.
Malüm olğanı kibi, 2015 senesi aprel 1-de ATR ve Lâle qırımtatar telekanalları, Meydan ve «Lider» radioları Rusiye qaydınıñ olmağanından sebep işini toqtattılar.
Aprel 2-de «Qırım» qırımtatar cemaat areketi cumhuriyetti qırımtatar cemaat teleradiokompaniyasını açmağa teklif etti. Qırımnıñ şimdiki yolbaşçısı Sergey Aksönov qırımtatar cemaat teleradiokompaniyasına 177 million ruble ayırılacağını bildirdi.
Yañı cemaat qırımtatar teleradiokompaniyasınıñ adı «Millet» olacaq. Bunı Qırım ükümetiniñ baş nazir muavini Ruslan Balbek bu künleri bildirdi.
