Link açıqlığı

Mehmet Zafer Üskül Qırımnıñ milletlerara munasebetler devlet komiteti onıñ adından yapqan beyanatnı red etti


Türkiye eyyetiniñ reberi Mehmet Zafer Üskül Qırımnıñ milletlerara munasebetler ve sürgün olunğan grajdanlarnıñ işleri boyunca devlet komitetiniñ matbuat hızmeti bergen haberni red etti. Olarnıñ bildirgenine köre, Mehmet Zafer Üskül «qırımtatarlarnıñ yaşayış şaraitlerinden memnün qalğanını» ayttı. Mehmet Zafer Üskül onıñ adından yapılğan bir de bir beyanatnı red ete, çünki eyyetniñ işi daa yekünlenmedi, – dep ayttı o QHA agentligine.

«Men Qırımda bulunğan Türkiye eyyetiniñ reberi olam. Ziyaretimizniñ esas maqsadı eñ evelâ qırımtatarlarnıñ, ve umumen, qırımlılarnıñ vaziyetini ögrenmek, bar olğan problemlerni belgilemek. Ziyaret maqsadını yerine ketirmek içün bir sıra körüşüvni keçiremiz, ve şimdilik işimiz devam ete. Lâkin bugün menim adımdan bir şey bildirildi ve internette peyda oldı. Aytacağım, bu laflar menim fikir-tüşüncelerimni aks ettirmey. Ziyaret ve körüşüvlerden soñ netice çıqaracaqmız, ve bundan soñra cemaatqa hulâsalarımıznı aydınlatacaqmız. Aynı bu sebepten aytmaq isteyim ki, menim adımdan aytılğan şeyler fikirlerimni tam bir şekilde ifadelemey», – dep ayttı Mehmet Zafer Üskül.

Qırımnıñ Rusiye ükümetiniñ milletlerara munasebetler ve sürgün olunğan grajdanlarnıñ işleri boyunca devlet komiteti Türkiye eyyetiniñ reberi Mehmet Üskülniñ aytqanlarına esaslanıp, beyanatnı aydınlattı.

«Eyyetimiz mında bulunğan eki kün içinde bizler Qırım ükümeti, cemaat vekilleri ile körüştik, qırımtatarlar toplu yaşağan yerlerni ziyaret etti. Bugün körgenimiz – meni tınçlandıra, Qırım tarafına teşekkür bildirip, olarnı da Türkiyeni ziyaret etmege davet etem», – dep tekrarladı Üskülniñ aytqanlarını Qırım komitetiniñ matbuat hızmeti.

Bazarertesi künü, aprel 27-de, Aqmescitke ğayrı resmiy Türkiye eyyeti keldi. Qırımtatarlarnıñ Qırımdaki vaziyetini ögrenecek olğan eyyetniñ erkânında alim ve uquq qorçalayıcılar bar.

Qırımtatar Milliy Meclisiniñ reisi Refat Çubarov Türkiye parlamentiniñ vekilleri eyyetiniñ Qırım ziyareti boyunca neticeler çıqarmağa aşıqmamağa çağırdı. Çubarov çarşenbe künü, aprel 29-da, Facebook saifesinde bildirdi ki, bunıñ kibi eyyetniñ yollaması, onıñ maqsat ve vazifeleri, Qırımdaki iş cedveli er bir taraf, şu cümleden qırımtatar halqınıñ milliy lideri Mustafa Cemilev ile muzakere etilgen edi.

XS
SM
MD
LG