Qırımda Qırımtatar Milliy Meclisiniñ bir qaç reberi ve faalini Taqiqat komitetine sorğuğa çağırdılar. Bunı çarşenbe künü, aprel 29-da, Qurultay Merkeziy saylav komissiyasınıñ reisi Zair Smedlâyev bildirdi, dep haber ete Qırım.Aqiqat.
Onıñ aytqanına köre, Qırımtatar Milliy Meclisi reisiniñ birinci muavini Nariman Celâl kene sorğuğa çağırıldı. Bundan ğayrı, Meclis Kâtibiyetiniñ reberi Dilâver Akiyev, Meclis azaları Ali Hamzin ve Enver Kütiyev sorğuğa çekilecek. Episini «fevral 26» işi boyunca sorğuğa çağıralar, – dep bildirdi Zair Smedlâyev Facebook saifesinde.
«Cedvel tolu degildir. Episini 2014 senesi fevral 26-da Qırım Muhtar Cumhuriyetinde, Qırım Yuqarı Radasınıñ binası yanında olıp keçken adise-vaqialar boyunca davet eteler! Belki de, olar o vaqialarnıñ bütün iştirakçilerini davet etmek isteyler, o vaqıt taqiqat komitetiniñ hadimleri teşkil etken qanunsız miting ya da piket olacaq», – dep ayttı Smedlâyev.
Zair Smedlâyevni de Qırımnıñ Taqiqat komitetinde sorğuğa çektiler. Onıñ aytqanına köre, taqiqatçılar Ahtem Çiygoznıñ (Meclis reisi muavininiñ – muar.) keçken seneniñ fevral 26 künü tedbirleriniñ teşkil etilmesinde rolüni ögrenmege tırıştılar.
Hatırlatamız, 2014 senesi fevral 26-da Qırım parlamentiniñ binası ögünde Qırımtatar Milliy Meclisi ve «Rus birliginiñ» bir qaç biñ tarafdarı toplaşqan edi. Tedbirni Meclis reisi Refat Çubarov ve «Rus birliginiñ» lideri Sergey Aksönov teşkil ettiler. Çatışmalar neticesinde eki insan elâk oldı. Rusiye Taqiqat komiteti bundan sebep cinaiy işni açtı.
Onıñ taqiqatı çerçivesinde «kütleviy numayışlarnı teşkil etüv ve iştirak etüvde şeklengen» Qırımtatar Milliy Meclisiniñ reis muavini Ahtem Çiygoz yanvar 29-da yaqalandı. Onı 2015 senesi fevral 19-ğa qadar apiske aldılar, soñra da apis müddetini mayıs 19-ğa qadar arttırdılar.
Aprel 22-de işbu iş boyunca ATR qırımtatar telekanalınıñ operatorı Eskender Nebiyev apiske alındı, bundan evel ise Ali Asanov da apiske alınğan edi.
