Link açıqlığı

Devlet hainliginde şeklengen sabıq Qırım deputatı eki ayğa qadar apiske alındı


Kiyevniñ Peçersk rayon mahkemesi, 2015 senesi aprel 29 künü

Kiyevniñ Peçersk rayon mahkemesi devlet hainliginde şeklengen sabıq Qırım deputatı Vasiliy Ganışnıñ cezasını belgilendi – eki aylıq apis cezası. Ganış iyün 25 kününe qadar apiste oturacaq, – dep bildire mahkemeden Qırım.Aqiqat mühbiri.

Mahkemeci Tatyana Ostapçuk Qırım Muhtar Cumhuriyeti prokuraturasınıñ muracaatını bütünley qabul etti. O, Ganışnı apiske almaq qararında qayd etti ki, şeklengen şahıs taqiqattan gizlene ve oña basqı yapa bile.

Qırım deputatınıñ adliyecisi Andrey Rudenko Qırım.Aqiqatqa bildirdi ki, o, itiraz bildirip, cezanı ev apisine deñiştirmege talap etecek.

«Vasiliy Vasilyeviçniñ Belaya Tserkov şeerinde soy-sopları bar, anda o mahkemeden aldın taqiqat vaqtında qala bile ve, onıñ sağlığını köz ögüne alsaq, ep apisi onıñ içün daa uyğun ceza olacaq», – dedi Rudenko.

Qırım.Aqiqat bildirgeni kibi, çarşenbe künü, aprel 29-da, Kiyevniñ Peçersk rayon mahkemesi Qırımnıñ sabıq deputatı Vasiliy Ganışnıñ cezasını belgiledi. Ganış devlet imayesinden vazgeçip, şahsiy adliyeci Andrey Rudenko ile añlaşma tizdi.

Aprel 28-de Ukraina havfsızlıq hızmeti Ukraina Devlet sıñır hızmeti ile beraber onı Qırım çıkışında yaqaladılar. Ganış apiske alındı, çünki onı qıdıra ediler. Baş prokuratura onı devlet hainliginde şekley. Ukraina taqiqatçılarınıñ malümatına köre, Ganış Qırım statusı aqqında «referendum» keçirilmesine rey bergenlerden biri edi, ve böyle etip Ukraina topraq bütünligine zarar ketirmege tırıştı.

XS
SM
MD
LG