Link açıqlığı

Freedom House: Qırım matbuat serbestliginiñ seviyesi alçaq olğan territoriyalarnıñ sırasına kirdi


Rusiye tarafından işğal etilgen Qırım matbuat serbestliginiñ seviyesi alçaq olğan on memleket ve territoriya sırasına kirdi. Yarımada Aqrusiye, İran, Turkmenistan, Özbekistan memleketleri yanındadır, dep bildire AQŞ Freedom House teşkilâtı.

Uquq qoruyıcılar dünyada matbuat serbestligi seviyesi soñki on yıl içinde eñ alçaq olğanını bildireler. Bunı jurnalistlerge nisbeten basqı ve matbuat vastalarınıñ areketini sıñırlağan qanunlar ile añlatalar.

Aprel 29 künü aşkâr etilgen arizada Freedom House 2014 senesi 18 memleket ve territoriyalarda matbuat serbestliginiñ sıñırlavı aqqında bildire.

Şu cümleden, Rusiye matbuat vastalarınıñ büyük bir qısmı devletke boysuna. Freedom House Rusiyeni «aqiqiy jurnalistikanı yoq etmek içün hatalı ve havflı teşviqatnıñ qullanuvı» sebebinden takbih ete.

Malüm olğanı kibi, 2015 senesi aprel 1-de ATR ve Lâle qırımtatar telekanalları, Meydan ve «Lider» radioları Rusiye qaydınıñ olmağanından sebep yayınlavını toqtattılar.

XS
SM
MD
LG