Qırımtatar Milliy Meclisi reisiniñ birinci muavini Nariman Celâl bildirdi ki, al-azırda Qırımda bulunğan Türkiye eyyetine yarımadada insan aqlarınıñ bozulması, şu cümleden, qırımtatarlarğa basqı yapılğanını tarif ettiler.
Bu aqqında Meclisniñ matbuat hızmeti bildire.
«Musafirlerge öldürüv, qaçıruv, apis cezaları ve sorğular aqqında malümat berdik. Topraq meselesi, til meselesi, milliy kütleviy haber vastalarınıñ faaliyet problemlerini ayrı muzakere ettik ve ilâhre. Olarnı meraqlandırğan suallerge cevap berdik», – dedi Celâl.
Türkiye eyyeti Qırımda aprel 30-ğa qadar bulunacaq. Çarşenbe künü, aprel 29-da, Celâlnıñ malümatına köre, aprel ayından itibaren Roskomnadzor iznini alamayıp işini toqtatmağa mecbur olğan ATR qırımtatar telekanalınıñ reberligi ile körüşüv keçirilmesi planlaştırıla.
Bazarertesi künü, aprel 27-de, Aqmescitke ğayrı resmiy Türkiye eyyeti keldi. Qırımtatarlarnıñ Qırımdaki vaziyetini ögrenecek olğan eyyetniñ erkânında alim ve uquq qorçalayıcılar bar.
Eyyet erkânına Türkiye Büyük Milliy Meclisiniñ AK Partili sabıq deputatı Mehmet Zafer Üskül, Türkiye parlamentiniñ insan aqları saasındaki tedqiqler komissiyasınıñ sabıq yolbaşçısı, uquq qorçalayıcı Levent Korkut, Tış iqtisadiyat alâqalar Şurasınıñ Avrasiya regionınıñ memleketleri ile işbirlik koordinatorı Çala Mazlum, em de Türkiye aliy oquv yurtlarınıñ bir qaç hadimi kirmekte.
