Qırım akimiyeti yarımadağa Türkiyeden kelgen nasıldır bir eyyet aqqında bildire. Eyyet aprel 28-de, salı künü, Rusiye Tış işler nazirligi ile uyğunlaşıp, «Aqmescit» ava limanına Moskvadan kelgen eken. Bunı Qırım baş nazir muavini Ruslan Balbek bildire, – haber ete Qırım ükümetiniñ «ruporı» Krıminform saytı.
Onıñ aytqanına köre, eyyet azaları Qırımda Rusiye akimiyetiniñ qırımtatar ve diger aqlanğan halqlarnıñ abadanlaştıruvına yönelgen areketleri ile tanış olmaq niyetindedir.
«Körüşüv neticesinde olarğa Qırım ve qırımtatarlarnıñ vaziyeti aqqında Ğarpnıñ efsanelerine qulaq asmayıp, qırımtatarlar diger qırımlılar ile birlikte Qırımnıñ Rusiye terkibine qaytmasından tek kâr qazanğanını öz közleri ile körmege teklif etildi», – dedi Balbek.
Malüm ki, eyyet terkibine Türkiye Büyük millet meclisiniñ sabıq deputatı Mehmet Zafer Üskül, uquq qoruyıcı Levent Korkut, Türkiye aliy oquv yurtlarınıñ ilmiy hadimleri kirdi.
Qırım ziyaretleriniñ ilk künü eyyet akimiyet tarafdarı olğan «Qırım» areketiniñ başı Remzi İlyasov ve «Namus», «Qardaşlık», «İnkişaf», «Sodrujestvo», «Qırımtatar yaşlar komiteti» cemaat teşkilâtlarınıñ vekilleri ile körüşti.
