ATR qırımtatar telekanalı Rusiye Federatsiyasınıñ qanuniyetine köre yayınlavını keçirmek içün bütün zaruriy vesiqalarnı elde etmege tırışa. Bunı ATR baş müdiri Elzara İslâmova, Roskomandzor başı Aleksandr Jarovnıñ sözlerini izaatlap, bildirdi. Soñkisi, telekanal bütün kerek olğan vesiqalarnı toplasa, ATR qayd etilecegini bildirgen edi, haber ete Qırım.Aqiqat.
Bundan da ğayrı, Jarov «telekanal yayınlavı mütenasip arizanı bergen saiplerniñ teşebbüsi ile toqtatılğanını» ve Qırımğa kelmege azır olğanını bildirdi.
ATR baş müdiri Elzara İslâmova telekanal dört kere Roskomnadzorğa vesiqalarnı bergeni aqta hatırlattı.
«Yayınlavımıznıñ pekitilmesine bar küçümiz ile ıntılacaqmız», – dey o.
Elzara İslâmovanıñ sözlerine köre, ATR telekanalı «Jarovnıñ Qırımğa kelmek azır olğanını» eyecan ile qarşıladı. «Roskomnadzor başını qabul etip, telekanalımıznıñ qayd etilmesi içün zaruriy vesiqalarnı onıñ ögünde toplamağa azırmız», – dedi ATR baş müdiri.
O, Jarovnıñ qırımtatar telekanalı öz istegi ile yayınlavını toqtatqanı aqqında aytqan sözlerini tasdiqladı.
«Biz bunı gizlemey edik. Mesele şunda ki, matbuat vastamız Ukraina devlet organlarınıñ musaadesi boyunca yayınlavını tek 2015 senesi aprel 1-ne qadar keçire bile edi», – añlattı ATR baş müdiri.
Şunıñ içün, Rusiye qanuniyetiniñ talaplarını yerine ketirmek içün, ATR ve «Atlant-SV» mediaholdingi terkibine kirgen diger matbuat vastaları öz yayınlavını toqtatmağa mecbur edi – Rusiye qanuniyetiniñ talabını yerine ketirmek ve «nice yıllar devamında qazanılğan» mülkiyetni saqlamaq içün.
«Şu sebepten 2015 senesi mart 31 künü Qırım Cumhuriyetiniñ radiotelevizion merkezine muracaat etip, ATR telekanalı ve «Meydan» radiosınıñ yayınlavını keçirgen aletlerni «vaqtınca, sualniñ al etilmesine qadar» söndürmege ricada bulundıq. Mektüpte, zaruriy vesiqalarnıñ resmiyleştirüvinden soñ işbirlikniñ devam ettirüv imkâniyeti doğrudan-doğru yazılğandır», – dedi İslâmova.
Bunıñ ile ATR yolbaşçılığı bildirgeni kibi, eger de Roskomnadzor bundan sebep ceza olmaycağını tasdiqlağan kefaletlerni berse, telekanal aman işke devam etmege azır eken.
«Matbuat vastalarımız keçken seneden berli qayd etilip olamay. Rusiye qanuniyetine köre qayd etmege ıntılğanımız şübesizdir. Bu sebepten Roskomnadzor yolbaşçısına, nevbetteki arizamız daa baqılmağanına qadar, işimizge devam etmek musaaadesiniñ berilmesi içün minnetdar olur edik. Matbuat vastalarımıznıñ auditoriyası akimiyetniñ böyle adımına lâyıq qıymet keser edi», – dedi Elzara İslâmova.
Malüm olğanı kibi, 2015 senesi aprel 1-de ATR ve Lâle qırımtatar telekanalları, Meydan ve «Lider» radioları Rusiye qaydınıñ olmağanından sebep yayınlavını toqtattılar.
