Qırımda aprel 28 künü qırımtatar milliy areket faali, Qurultay Merkeziy saylav komitetiniñ başı Zair Smedlâyevni Taqiqat komitetinde sorğuğa çektiler.
Qırım.Aqiqatqa bildirgeni kibi, sorğu eki saat devam etken edi, taqiqatçılar 2014 senesi fevral 26 künü olğan vaqialar ile meraqlana edi.
«Taqiqatçığa bir sual bergen edim – Ukraina vaqialarına Rusiye Federatsiyasınıñ taqiqat komitetiniñ alâqası nasıl? Cevap, tabiiy ki, olmadı. Ölgenler bar olğanı aqqında söz yürütildi, sual – elâk olğanlar Rusiye Federatsiyasınıñ vatandaşı edimi? Kene sükünet – taqiqat sırı», – dedi Smedlâyev.
Onıñ aytqanına köre, taqiqatçılar Ahtem Çiygoznıñ (Meclis reisiniñ muavini – muar.) fevral 26 künü tedbirleriniñ teşkil etüvinde iştiragini ögrenmege tırışqanlar.
«Qırımtatar Milliy Meclisi tarafından işbu tedbirniñ teşkilâtçısı Refat Çubarov, «Russkoye yedinstvo» tarafından – Sergey Aksönov olğanını bildirdim ve bunı sorğu protokolına kirsetmege talap ettim», – dedi Smedlâyev.
Aprel 28 ve 29 künleri sorğuğa çekilgen Meclis azalarına nisbeten «cinaiy işlerniñ açılması içün sebep olmağanını» bildirdi.
Aprel 27 künü Qırımda Qırımtatar Milliy Meclisiniñ azası Abduraman Egiz ve Meclis Kâtibiyetiniñ reberi Dilâver Akiyevniñ sorğusı keçken edi.
Hatırlatamız, 2014 senesi fevral 26-da Qırım parlamentiniñ binası ögünde Qırımtatar Milliy Meclisi ve «Rus birliginiñ» bir qaç biñ tarafdarı toplaşqan edi. Tedbirni Meclis reisi Refat Çubarov ve «Rus birliginiñ» lideri Sergey Aksönov teşkil ettiler. Çatışmalar neticesinde eki insan elâk oldı. Rusiye Taqiqat komiteti bundan sebep cinaiy işni açtı.
Onıñ taqiqatı çerçivesinde «kütleviy numayışlarnı teşkil etüv ve iştirak etüvde şeklengen» Qırımtatar Milliy Meclisiniñ reis muavini Ahtem Çiygoz yanvar 29-da yaqalandı. Onı 2015 senesi fevral 19-ğa qadar apiske aldılar, soñra da apis müddetini mayıs 19-ğa qadar arttırdılar.
Aprel 22-de işbu iş boyunca ATR qırımtatar telekanalınıñ operatorı Eskender Nebiyev apiske alındı, bundan evel ise Ali Asanov da apiske alınğan edi.
