Link açıqlığı

Ukraina prokurorları Qırımda Meclis reisi muavininiñ yaqalanmasınen bağlı cinaiy taqiqatqa başladılar


Qırımtatar Milliy Meclisi reisiniñ birinci muavini Nariman Celâlnıñ qanunsız yaqalanması ile bağlı cinaiy taqiqat başladı.

Bunı Ukraina Baş prokuraturasınıñ matbuat hızmeti bildire.

Haberde aytıla ki, qıtaiy Ukrainada yerleşken Qırım Muhtar Cumhuriyetiniñ prokuraturası İnternet monitoringiniñ neticelerine köre aprel 24-te Aqmescitte Qırımtatar Milliy Meclisiniñ toplaşuvında işbu teşkilâtnıñ reis muavini Nariman Celâl qanunsız alda yaqalanğanını ögrendi.

«Onı Rusiye Federatsiyası Taqiqat komitetiniñ Qırım Cumhuriyeti boyunca Baş taqiqat idaresi qanunsız alda yaqaladı. Bu Rusiye Federatsiyası tarafından işğal etilgen topraqta insannı azatlıqtan qanunsız alda marum qaldıruv, qorqutuv, zorbalıq, qanunsız qurulğan akimiyet organları tarafından qırımtatarlarğa nisbeten basqı yapılğanını tasdıqlay», – aytıla beyanatta.

Böylece, Qırım Muhtar Cumhuriyetiniñ prokuraturası Ukraina Cinaiy kodeksiniñ 146-ncı maddesiniñ 1-inci qısmı belgilegen cinayet (İnsannı qanunsız alda azatlıqtan marum qaldıruv ya da qaçıruv) unsurları boyunca mahkemeden aldın taqiqatqa başladı.

Mezkür cinayetniñ malümatları Ukraina Baş prokuraturasına berildi.

Qırım.Aqiqat bildirgeni kibi, aprel 24-te Qırımda uquq qoruyıcılar Qırımtatar Milliy Meclisi reisiniñ birinci muavini Nariman Celâlnı sorğuğa alıp kettiler. Bu kün Meclis toplaşuvı ötkerilecek edi. Sorğu kene de 2014 senesi fevral 26da olıp keçken adise-vaqialarnen bağlı oldı.

XS
SM
MD
LG