Qırımda 2014 senesi mayıs 3-te Ermeni Bazardaki kiriş noqtasında «Berkut» bölüginiñ hadimine qarşı küç qullanuvı ile bağlı taqiqat yekünlendi.
Bunı Rusiye Taqiqat komiteti Qırım idaresiniñ matbuat hızmeti bildirdi.
Haberde aytıla ki, Rusiye Cinaiy kodeksiniñ 318-inci maddesiniñ 2-nci qısmı belgilegen cinayette – akimiyet temsilcisine qarşı sağlıqqa zarar bere bilgen zorbalıq qullanuvı – qabaatlanğan 24 yaşında Qurman rayonınıñ sakinine qarşı cinaiy işniñ taqiqatı yekünlendi.
«Taqiqatnıñ malümatına köre, 2015 senesi mayıs 3-te kündüz qabaatlanğan şahıs «Ermeni Bazar» kiriş noqtasında yanındaki yolda bulunıp, militsiyanıñ «Berkut» mahsus bölüginiñ hadimine qarşı küç qullandı ve oña beden zarar ketirip, vaqia yerinden gizlendi», – dep aytalar Taqiqat komitetinde.
Komitetniñ malümatına köre, taqiqat devamında «qabaatlanğannıñ bu cinayetke alâqalarını isbatlağan deliller toplandı».
Prokuror qabaat qararını çıqardı, yaqın vaqıtta cinaiy iş mahkemege yollanılacaq.
2014 senesi mayıs 3-te qırımtatarlar Ermeni Bazarda Qırımğa alınmağan milliy lideri Mustafa Cemilevni qarşıladıla. Biñge yaqın qırımtatarı sıñırğa kelgen edi. Mında silâlı adamlar da bar edi – Rusiyeniñ OMON mahsus bölüginiñ vekilleri, Qırım samooboronası.
Bundan soñra Qırımda bu körüşüvniñ iştirakçilerini yaqalamağa başladılar. «Mayıs 3 işi» boyunca 5 kişi apiske alındı.
