Link açıqlığı

Keçken raatlıq künleri belgisiz şahıslar Bağçasaray rayonınıñ Tav Badraq köyünde (Skalistoye) camini ateşke bermege tırıştılar. Cami binasına yanğın qarışması ile bir qaç şişe atıldı.

Bunı Qırım musulmanları diniy idaresiniñ matbuat hızmeti bildire.

«Kene yahşı, cami büyük zarar körmedi. Qomşular olğannı ertesi kün saba kördiler. «Yıldız nurı» yerli musulman cemiyetiniñ reisi Safet Zaitov uquq qoruyıcı organlar, FSB hadimlerini, yanğıncılarnı çağırdı», – aytıla beyanatta.

QMDİ malümatına köre, İçki işler nazirligi bölüginiñ taqiqat operativ gruppası qomşu ve yerli sakinlerni sorğuğa çekti, uquq qoruyıcılar parmaq izlerini aldılar, qarışma ve cam parçalarını teşkerüvge aldılar. Elde etilgen malümatlarğa köre, vaqia aprel 26-da saba saat 4.30-da olıp keçti.

«Yerli sakinler, em musulman, em hristianlar, bir şey añlamaylar ve bunı provokatsiya dep tanıylar, çünki böyle bir şey, olarnıñ aytqanına köre, köyde ilk sefer ola, mında farqlı millet ve din temsilcileri barışıqta yaşaylar. Bunı bir-biriniñ qarşısında yerleşken musulman camisi ve ortodoks kilsesi tasdıqlay», – dep qayd ete QMDİ.

«Yıldız nurı» yerli musulman cemiyetiniñ reisi Safet Zaitovnıñ fikirince, cami muqaddes bir yer olıp, büyük zarar körmedi.

Beyanatta aytıla ki, Tav Badraqtaki cami cenkten evel olğan yerde yerleşe. 1844 senesi qurulğan cami sovetler zamanında qırımtatarlar sürgün etilgen soñ yoq etildi, onıñ yerinde ise aşayt tükânı qurulğan edi.

2002 senesi tükân binasını Qırım musulmanları diniy idaresi satın aldı ve yerli musulman cemiyetine berildi. Binanıñ minaresi quruldı ve ibadet yeri olaraq açıldı. Al-azırda bu cami yaqın yerleşken üç köy içün bir sayıla. Binada 100 kişi sığa bile.

Tav Badraqta, yerli musulman cemiyetiniñ reisi bildirgeni kibi, 160 qırımtatar qorantası oturmaqta.

XS
SM
MD
LG