Link açıqlığı

Qırım studentlerinden Qırım logotipini uydurmağa rica eteler


Qırım kurort ve turizm nazirligi Qırım aliy oquv yurtlarınıñ studentlerini yarımadanıñ turistik işaretini uyduruv işine celp etecek. Bunı Qırım Cumhuriyetiniñ kurort ve turizm naziri Yelena Yurçenko Aqmescit matbuat konferentsiyasında bildirdi, – dep haber ete Qırım ükümetiniñ «ruporı» Krıminform saytı.

«Mütehassıslarımız Vernadskiy adına Qırım federal universitetine barıp, Qırımnıñ genç ve studentlerini celp etmege tırıştılar», – dedi o.

Yurçenkonıñ qayd etkenine köre, kelgen seksen tekliften iç biri lâyıq degil.

«Şimdilik, açıq aytam, tesir etmedi. Bu sebepten devam etemiz, vaqıt daa bar», – dedi o.

Malüm olğanı kibi, 2014 senesi oktâbr ayında kurort naziri Yelena Yürçenko Artemiy Lebedevniñ dizayn studiyasına mektüp yollap, Qırımnıñ turistik işaretini azırlamağa rica etti. Variantlar içtimaiy ağlarda aydınlatılğan soñ nazir bu teşebbüsni izaatlamaqtan vazgeçti.

Soñra Kurort nazirligi turistik Qırımnıñ logotip yarışını ilân etti, onıñ neticeleri iyülniñ soñunda belli olacaq.

XS
SM
MD
LG