Türkiye prezidenti Recep Tayip Erdoğan dedi ki, «Rusiye, 1915 senesi Osmanlı devletinde türkler tarafından ermenilerniñ kütleviy öldürüvlerine genotsid aytmaq yerine özüniñ Ukrainada yapqanlarını añlatmaq kerek».
BBC bildire ki, bunı Recep Tayip Erdoğan Ankarada matbuat konferentsiyasında ayttı.
«Rusiye bu meselede genotsid sözüni ilk sefer qullanmay. Şahsen men Putinniñ bu adımına yazıqsınam. Ukraina ve Qırımda üküm sürgen vaziyet iç bir şübe doğurmay. Başta bunı añlatsınlar, soñra ise bir şeyge genotsid desinler», – dep tekrarlay Türkiye prezidentiniñ aytqanlarını Reuters agentligi.
Vladimir Putin Erivanda Osmanlı devletinde ermenilerniñ kütleviy öldürüvleri aqqında tedbirlerde dedi ki, Rusiye «insaniyetlik tarihında eñ deşetli facialardan birini başından keçirgen ermeni halqına qayğıdaş ola».
Malüm olğanı kibi, aprel 24-te Osmanlı devletinde ermenilerge qarşı areketlerniñ 100 yıllığı toldı. Qurbanlarnıñ sayısı aqqında malümatlar pek farqlı: Türkiye eki yüz biñ ermeni aqqında ayta, ermeniler ise eki million insan aqqında bildireler.
