Link açıqlığı

Qırımda eki Meclis azasınıñ «fevral 26 işi» boyunca sorğusı yekünlendi


Qırımda Qırımtatar Milliy Meclisiniñ azası Abduraman Egiz ve Meclis Kâtibiyetiniñ reberi Dilâver Akiyevniñ bir qaç saat devam etken sorğusı yekünlendi. Bunı Abduraman Egiz Qırım.Aqiqat mühbirine bildirdi. Onıñ aytqanına köre, qırımlılarnı «fevral 26 işi» boyunca sorğuğa çağırdılar.

«Bizni fevral 26 işi boyunca çağırdılar. Er birini ayrı-ayrı. Uquq qoruyıcılar özüni ğayet nezaketli alıp bardılar. Bir qaç saat subetleştik. Taqiqatçı sual berdi. Men cevap berdim», – dep qayd etti Abduraman Egiz.

Qırım.Aqiqat saytı bildirgeni kibi, aprel 27-de Qırımtatar Milliy Meclisiniñ azası Abduraman Egiz, temsil organınıñ diger azaları da sorğuğa çağırıldı.

Hatırlatamız, 2014 senesi fevral 26-da Qırım parlamentiniñ binası ögünde Qırımtatar Milliy Meclisi ve «Rus birliginiñ» bir qaç biñ tarafdarı toplaşqan edi. Tedbirni Meclis reisi Refat Çubarov ve «Rus birliginiñ» lideri Sergey Aksönov teşkil ettiler. Çatışmalar neticesinde eki insan elâk oldı. Rusiye Taqiqat komiteti bundan sebep cinaiy işni açtı.

Onıñ taqiqatı çerçivesinde «kütleviy numayışlarnı teşkil etüv ve iştirak etüvde şeklengen» Qırımtatar Milliy Meclisiniñ reis muavini Ahtem Çiygoz yanvar 29-da yaqalandı. Onı 2015 senesi fevral 19-ğa qadar apiske aldılar, soñra da apis müddetini mayıs 19-ğa qadar arttırdılar.

Aprel 22-de işbu iş boyunca ATR qırımtatar telekanalınıñ operatorı Eskender Nebiyev apiske alındı, bundan evel ise Ali Asanov da apiske alınğan edi.

XS
SM
MD
LG