Link açıqlığı

Yarımadada ATR qırımtatar telekanalınıñ yayını saibiniñ teşebbüsi ile toqtatıldı, dep ayttı bazarertesi künü «Kerçek ve adalet» mediaforumında Bağ, malümat tehnologiyaları ve kütleviy alâqalarnı nezaret boyunca federal hızmetiniñ (Roskomnadzor) yolbaşçısı Aleksandr Jarov.

Rusiye kütleviy haber vastaları bildire ki, hızmet yolbaşçısınıñ malümatına köre, kanal tesisçileri vesiqalarnı dört kere berdiler, lâkin er seferinde olar «tolu degil ediler».

«Er sefer bunıñ yanında ses-şamata ve piar-kampaniya bar edi. Telekanal yayını ariza bergen saipleriniñ teşebbüsi ile toqtatıldı. Olarnı bir kimse söndürmeycek edi», – dedi Jarov.

Mart ayınıñ soñuna qadar ATR media-holdingi Rusiye qanunlarına köre kütleviy haber vastası olaraq öyle de qayd olamadı. Şirket Roskomnadzorğa vesiqalarını bir qaç kere bergen edi, lâkin olarnı farqlı sebeplerden keri qaytara ediler. Aprel 1-ge keçer gecesi ATR telekanalı, Lâle bala telekanalı işini toqtatmağa mecbur oldılar. «Meydan» ve «Lider» radioları da diñleyicilerinen sağlıqlaştılar. Reberlik telekanalnı qayd etmege tırışacağını bildirdi.

Aprel 2-de «Qırım» qırımtatar cemaat areketi cumhuriyetti qırımtatar cemaat teleradiokompaniyasını açmağa teklif etti. Qırımnıñ şimdiki yolbaşçısı Sergey Aksönov qırımtatar cemaat teleradiokompaniyasına 177 million ruble ayırılacağını bildirdi.

Yañı cemaat qırımtatar teleradiokompaniyasınıñ adı «Millet» olacaq. Bunı Qırım ükümetiniñ baş nazir muavini Ruslan Balbek bu künleri bildirdi.

XS
SM
MD
LG