Link açıqlığı

Smedlâyev: Qırımda Meclisniñ daa bir azasını «fevral 26 işi» boyunca sorğuğa çekeler


Qırımtatar Milliy areketiniñ faali, Qurultay Merkeziy saylav komissiyasınıñ reisi Zaur Smedlâyev Taqiqat komiteti tarafından «fevra 26» işi boyunca keçirilgen daa bir sorğu aqqında bildire.

Onıñ malümatına köre, aprel 27-de Qırımtatar Milliy Meclisiniñ azası Abduraman Egiz sorğuğa çağırıldı, temsil organınıñ diger azaları da sorğuğa çağırıla.

«Meclis Kâtibiyetiniñ reberi Dilâver Akiyev de davet etildi, yarın meni çağıralar. Qırım Yuqarı Radasınıñ binası yanında provokatsiyalarnıñ kerçek teşkilâtçıları ne vaqıt çağırılacaq eken ya da olar yanında keçken «aziz sığır» olıp qalacaqlar», – dep yazdı o Facebookta.

Hatırlatamız, 2014 senesi fevral 26-da Qırım parlamentiniñ binası ögünde Qırımtatar Milliy Meclisi ve «Rus birliginiñ» bir qaç biñ tarafdarı toplaşqan edi. Tedbirni Meclis reisi Refat Çubarov ve «Rus birliginiñ» lideri Sergey Aksönov teşkil ettiler. Çatışmalar neticesinde eki insan elâk oldı. Rusiye Taqiqat komiteti bundan sebep cinaiy işni açtı.

Onıñ taqiqatı çerçivesinde «kütleviy numayışlarnı teşkil etüv ve iştirak etüvde şeklengen» Qırımtatar Milliy Meclisiniñ reis muavini Ahtem Çiygoz yanvar 29-da yaqalandı. Onı 2015 senesi fevral 19-ğa qadar apiske aldılar, soñra da apis müddetini mayıs 19-ğa qadar arttırdılar.

Aprel 22-de işbu iş boyunca ATR qırımtatar telekanalınıñ operatorı Eskender Nebiyev apiske alındı, bundan evel ise Ali Asanov da apiske alınğan edi.

XS
SM
MD
LG