Link açıqlığı

Rusiye prezidenti Vladimir Putin, Qırım işğalini izaatlap, «bir şeyden teessüf etmegenini» bildirdi. Bunı Rusiye devletiniñ başı Vladimir Putin «Rossiya 1» telekanalında «Prezident» filmi içün intervyüsinde ayttı, – haber ete TASS.

«Menimce, doğru yaptıq, bir şeyden peşman degilim», – dey Putin.

O şunı da koştı ki, esası «Qırımda yaşağan insanlarnıñ istegini añlamaq» edi.

«Rusiyege qaytmağa istegen insanlar, neonatsist, qattı milletçi ve banderovetslerge boysunmağa istemegen insanlar bar, olarnı qaldırmağa aqqımız yoq», – dey Putin.

«Bu printsipial meseledir. Bunı men o zaman şeriklerime aytqan edim: bizim içün eñ müim sual – insanlar olğanını añlatqan edim. Siz menfaatıñıznı nasıl qoruycaqsız, bilmeyim, biz ise, öz menfaatımız oğrunda soñuna qadar ketecekmiz», – dedi o.

«Bu ğayet emiyetli şeydir. Bir şeyni tutıp almaq, hırsızlamaq istemeymiz. Qırımnıñ Qara deñizde strategik emiyeti olğanına da bağlı degil. Bu tarihiy adaletliktir», – dedi Rusiye devletiniñ başı.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.

XS
SM
MD
LG