Link açıqlığı

Saatnıñ esas haberi

Meclis: Qırım akimiyeti Hıdırlez yardımı ile qırımtatar halqını bölmek niyetindedir


Qırımtatar Milliy Meclis reisi Refat Çubarov
Qırımtatar Milliy Meclis reisi Refat Çubarov

Qırım akimiyeti Hıdırlez yardımı ile qırımtatar halqını bölmek niyetindedir, – dedi Qırımtatar Milliy Meclis reisi Refat Çubarov bazar künü, aprel 26-da, aşkâr etilgen beyanatında, haber ete Qırım.Aqiqat.

«Milletimizni parçalamaq, küreş meydanından uzaqlaştırmaq içün yapqan ve yapacaq cinayetlerini dünyadan saqlamaq içün Qırım işğalcileri mayıs 3 künü tantanalı şekilde Hıdırlez bayramınıñ keçirilmesini ilân etti ve oña azırlıq köre. Bu aynecilikniñ manasını epiñiz yahşı añlaysıñız. Yazıqlar olsun, bu yapqan cinayetlerinde işğalciler aramızdan kendine oşağan bazı semetdeşlerimizni qullanalar», – dedi Çubarov.

Qırımtatar Milliy Meclis reisi aytqanı kibi, qırımlılar Qırımnı zapt etkenlerge «olarnı bu pis oyunlarğa qoşmağa fırsat bermemek» kerektirler.

«Epimiz öz-özümizge böyle sual bereyik: qırımtatar gençleri ğayıp olğan vaqıtta ve olarnıñ bazıları öldürilgende, sayğılı lider Mustafa Cemilev ve onıñ ile beraber Meclis reisi ve arqadaşlarımız İsmet Yüksel, Sinaver Kadırovğa Vatanda yaşamağa yasaq olğanda, Ahtem Çiygoz ve Ali Asanov apiste olğanda, ATR telekanalımız ve diger milliy matbuat vastalarımız qapatılğanda, iş adamlarımız er kün basqı altında olğanda, yüzlernen insanlarımız mahkeme ve sorğularğa çağırılğanda, bu cinayetçilerniñ tarafından azırlanğan Hıdırlezge qoşulmağa olurmı?», – dey o.

Refat Çubarov, qırımlılarğa muracaatta bulunıp, ağır zamanlar «mıtlaqa keçecegini» ayttı ve olarnı bir-birine daa da diqqatlı ve sabırlı olmağa çağırdı.

Bunıñ ile o gençlerge milliy duyğu ve vatanperverlikni aşlamağa, qırımtatar halqınıñ birlik ve menligini saqlamağa çağırdı.

XS
SM
MD
LG