Yañı cemaat qırımtatar teleradiokompaniyasınıñ adı «Millet» olacaq. Bunı RİA Novosti Qırım ükümetiniñ baş nazir muavini Ruslan Balbek bergen malümatına esaslanıp bildire.
«Telekanalnıñ adı belli – «Millet». Cumhuriyet yolbaşçısı qırımtatar cemaatı qırımtatar yayınlarınıñ vastasınen til ve medeniyet ihtiyaclarını qarşılasın dep, teleradiokompaniyanı qısqa müddet içinde qayd etmege ve çalıştırmağa avale etti», – dedi Balbek.
Neşirniñ malümatına köre, Aqmescitte 600 metr kârelik bina telekanal içün ayırıldı. Telekanal eñ zemaneviy donatmalarnen taqımlanacaq.
Baş nazirniñ bildirgenine köre, kanalnıñ yanında qırımtatar halqınıñ ilim saası ve icadiy ziyalılardan ibaret olacaq cemaat şurası qurulacaq.
Diger millet temsilcileriniñ, şu cümleden qaraylar ve qırımçaqlarnıñ celp etilmesi de muzakere etile.
«Bu kiçik halqlarnıñ til ve medeniyet hususiyetlerini saqlap qalmaq ihtiyacları bar. Olar yarımadanıñ medeniy mirasını yaraştıralar», – dep qayd etti Balbek.
Baş nazir muavini emin ki, Qırımda qırımtatar halqınıñ ve bütün qırımlılarnıñ menfaatlarını köz ögüne alıp çalışacaq semereli teleradiokompaniya meydanğa ketirilecek.
Telekanaldan ğayrı, yarımadada, Balbekniñ aytqanına köre, qırımtatar radiosı da açılacaq. Onıñ adı «Vetan» olacaqtır.
Qırım.Aqiqat bildirgeni kibi, Qırımda akimiyet yardımınen qurulğan yañı qırımtatar telekanalınıñ müdiri jurnalist Rustam Arifcanov ola bile.
Aprel 2-de «Qırım» qırımtatar cemaat areketi cumhuriyetti qırımtatar cemaat teleradiokompaniyasını açmağa teklif etti. Qırımnıñ şimdiki yolbaşçısı Sergey Aksönov qırımtatar cemaat teleradiokompaniyasına 177 million ruble ayırılacağını bildirdi.
Mart ayınıñ soñuna qadar ATR media-holdingi Rusiye qanunlarına köre kütleviy haber vastası olaraq öyle de qayd olamadı. Şirket Roskomnadzorğa vesiqalarını bir qaç kere bergen edi, lâkin olarnı farqlı sebeplerden keri qaytara ediler. Aprel 1-ge keçer gecesi ATR telekanalı, Lâle bala telekanalı işini toqtatmağa mecbur oldılar. «Meydan» ve «Lider» radioları da diñleyicilerinen sağlıqlaştılar. Reberlik telekanalnı qayd etmege tırışacağını bildirdi.
