Link açıqlığı

Meclis reisiniñ muavini Nariman Celâl taqiqat komitetinde sorğuğa çekildi


Üç politsiya hadimi cuma künü, aprel 24-te, Qırımtatar Milliy Meclisiniñ toplaşuvı başlamazdan evel Nariman Celâlğa ğayet müim işler taqiqatçısına sorğu celpnamesini berdiler. Subetni soñra keçirmek ıntıluvlarına baqmadan, Meclis reisiniñ muavinini taqiqat komitetine alıp ketiler. Bunı Nariman Celâl Facebookta yazdı.

Onıñ bildirgenine köre, onıñ fevral 26 işinen bağlı fikirleri deñişmedi.

«Sorğu kene de 2014 senesi fevral 26-da olğan adise-vaqialarnen, şu cümleden yaqında yaqalanğan ATR telekanalınıñ operatorı Eskender Nebiyevnen bağlı edi. Menim bu işnen bağlı fikirlerim deñişmedi, bunı taqiqatçığa ayttım. Zanımca, fevral 26 kününiñ adise-vaqialarını Ukraina uquq qoruyıcı organları taqiq etmeli, çünki vaqialar Ukrainada olıp keçken ve Ukrainanıñ topraq bütünligi ile bağlı edi», – dep yaza Celâl.

O, «Ahtem Çiygoznıñ apiske alınmasını ve qabaatını tamamen sebepsiz olğanını» tüşüne, dep bildirdi.

Bir qaç saat devam etken subetten ve video baqqan soñ Meclis reisiniñ muavini taqiqat komitetini terk etti.

Nariman Celâlnıñ aytqanına köre, celpname Meclisniñ daa bir vekiline berilmeli edi, lâkin şimdilik onıñ taqiqatçı ile subeti olmadı.

Nariman Celâlnıñ bu sorğusı birinci degil.

Qırım.Aqiqatnıñ malümatına köre, 2015 senesi mart ayınıñ soñunda Qırımdaki Taqiqat komitetiniñ idaresinde Meclis reisiniñ birinci muavini Nariman Celâlnıñ birinci sorğusı keçirilgen edi. Onı 2014 senesi fevral 26-da olıp keçken adise-vaqialar ile bağlı cinaiy iş çerçivesinde sorğuğa çekken ediler. Sorğudan soñ Celâlnıñ evinde uquq qoruyıcı organlarnıñ hadimleri tintüvni keçirdiler. Onı 2014 senesi fevral 26-da muhtariyetniñ parlamenti yanında olıp keçken çoq biñli miting ile bağlı cinaiy işniñ taqiqatı çerçivesinde malümat bermesi içün çağırğan ediler.

Bu kün Qırım parlamentiniñ binası ögünde Qırımtatar Milliy Meclisi ve «Rus birliginiñ» bir qaç biñ tarafdarı toplaşqan edi. Tedbirni Meclis reisi Refat Çubarov ve «Rus birliginiñ» lideri Sergey Aksönov teşkil ettiler. Çatışmalar neticesinde eki insan elâk oldı. Rusiye Taqiqat komiteti bundan sebep cinaiy işni açtı.

XS
SM
MD
LG