Türkiye Tış işler nazirligi Rusiye prezidenti Vladimir Putinni Osmanlı devletinde ermenilerniñ kütleviy öldürüvine «genotsid» aytqanından sebep takbih ete. Bunı Radio Svoboda bildire.
«Rusiyeniñ Kavkazda, Orta Asiyada ve Şarqiy Avropada keçken asırda yapqan öldürüv ve sürgünliklerni aytsaq, o, genotsid ve uquq tarafları ne olğanını daa yahşı bilmek kerek, dep tüşünemiz», – aytıla Türkiye Tış işler nazirliginiñ beyanatında.
Bugün Erivanda Osmanlı devletinde öldürilgen ermenilerniñ hatırasına keçirilgen matem tedbirinde Rusiye prezidenti Vladimir Putin «genotsid» sözüni qullandı. O, milletçilikniñ telükesi aqqında aytıp, «rusofobiya» sözüni qullanıp, Ukrainanıñ Avropağa qoltutqan akimiyetini tenqid etti.
Aprel 24-te Almaniya parlamenti Osmanlı devletinde ermenilernin öldürüvini genotsid olaraq tanıp, rezolütsiyanı qabul etti. Böylece Almaniya bunı tanığan 24-ünci memleket oldı.
Aprel 15-te Avropa parlamenti aprel 24 kününi Avropada 1915 senesi Osmanlı devletinde Ermenilerniñ genotsid qurbanlarınıñ hatıra künü olaraq ilân etip, Türkiyeni genotsid olğanını tanımağa çağırdı. Türkiye akimiyeti buña «tarihnı deñiştirmek» niyeti kibi qabaat ile cevap berdiler.
Ermenistan prezidenti Serj Sargsân dünya toplulığınıñ ermenilerniñ öldürüvini genotsid olaraq tanığan soñ «soñki 100 yıllıq inkârını» yoq etecegine ümüt etkenini bildirdi.
