Cuma künü, aprel 24-te, Qırımda ermeniler genotsidiniñ 100 yıllığına bağışlanğan yürüş keçirildi. Eki biñden ziyade ermeni ağa-qardaş Ayvazovskiyler eykelinden ermeni mezarlığında yerleşken aziz Akop kilsesine qadar yürdiler, dep bildire Qırım.Aqiqat.
İştirakçilerniñ qollarında Ermenistan bayrağı, çıraq, çeçek ve «Hatırlaymız! Talap etemiz!», «Ermenilerniñ genotsidi gizlenemez», «Ermenilerniñ genotsidini tanımağa talap etemiz» kibi yazılar ile levhaları bar edi.
Ermenilerniñ genotsid qurbanları abidesiniñ yanında miting ötkerildi. Tedbirde Qırımnıñ Rusiye yolbaşçısı Sergey Aksönov, onıñ muavini Mihail Şeremet, Qırım Devlet şurasınıñ deputatları, milliy cemiyetlerniñ vekilleri, Qırım «samooboronası» bulundılar.
Tedbir iştirakçileri yañıdan yapılğan abidege çeçeklerni qoydılar.
Cuma künü Ermenistannıñ paytahtı Erivan şeerinde dünyanıñ bir çoq memleketi tarafından genotsid olaraq tanılğan Osmanlı devleti zamanında kütleviy öldürüv ve sürgünlik adiseleriniñ yüz yıllığı ile bağlı matem tedbirleri keçirile.
Aprel 15-te Avropa parlamenti aprel 24 kününi Avropada 1915 senesi Osmanlı devletinde Ermenilerniñ genotsid qurbanlarınıñ hatıra künü olaraq ilân etip, Türkiyeni genotsid olğanını tanımağa çağırdı. Türkiye akimiyeti buña «tarihnı deñiştirmek» niyeti kibi qabaat ile cevap berdiler.
